भारतात परतताच मोदींनी घेतली अरुण जेटलींच्या कुटुंबियांची भेट !

नवी दिल्ली: विदेश दौऱ्यावरून परतल्यानंतर पंतप्रधान नरेंद्र मोदी यांनी माजी अर्थमंत्री दिवंगत अरुण जेटली यांच्या कुटुंबियांची भेट घेतली आहे. जेटलींच्या कैलाश कॉलनी येथील निवासस्थानी जाऊन त्यांच्या कुटुंबियांचे मोदींनी सांत्वन केले. अरुण जेटली यांच्या निधनावेळी मोदी परदेश दौऱ्यावर होते, त्यामुळे अंत्यसंस्काराला उपस्थित राहता आले नव्हते. दरम्यान, हा दौरा आटोपून आज भारतात परतल्यानंतर पंतप्रधानांनी थेट जेटलींच्या कुटुंबियांची भेट घेत सांत्वन केले. यावेळी केंद्रीय गृहमंत्री अमित शाह देखील उपस्थित होते.

जेटलींच्या निधनावेळी मोदी बहरीन दौऱ्यावर होते. मोदींनी बहरीनमध्ये भारतीय समुदयाला संबोधित करताना जेटलींच्या निधनावर दुःख व्यक्त केले होते. त्यांनी म्हटले होते, “मी भलेही येथे आपल्याशी बोलत असेन, देश जन्माष्ठमीचा उत्सवात दंग आहे. मात्र, मी माझ्या मनात मोठे दुःख दाबून ठेवले आहे. ज्या मित्रासोबत मी सार्वजनिक जीवनात आणि राजकीय प्रवासात पावलांसोबत पावले टाकत चाललो, प्रत्येकवेळी एकमेकांशी जोडलो गेलो होतो. स्वप्न रंगवताना आणि ती निभावताना ज्यांने मला साथ दिली त्या मित्राने अरुण जेटली यांनी आज आपला देह ठेवला. मी कल्पना करु शकत नाही की मी इथे आहे आणि माझा मित्र जग सोडून गेला आहे.”