भारतीय क्रिकेट संघाला धक्का; भुवनेश्वर कुमार जखमी

नवी दिल्ली: भारत वेस्ट इंडिजविरुद्धच्या आगामी वनडे मालीका अगोदर भारतीय क्रिकेट संघाला मोठा धक्का बसला आहे. भारतीय क्रिकेट संघाचा गोलंदाज भुवनेश्वर कुमार जखमी झाल्याने तो वेस्ट इंडिजविरुद्धच्या मालिकेला मुकणार आहे. भुवनेश्वरच्या जागी आता एका मुंबईच्या खेळाडूला टीम इंडियाकडून खेळण्याची संधी मिळणार आहे. वेस्ट इंडिजविरुद्ध मुंबईत झालेल्या अखेरच्या टी-२० सामन्यात भुवनेश्वर कुमार जखमी झाला. त्याला पुन्हा हर्नियाचा त्रास होत असल्याचे निदान झाले आहे.

येत्या १५ डिसेंबर दोन्ही संघादरम्यानची वनडे मालिका सुरु होत आहे. पहिला सामना खेळण्यासाठी भारतीय संघ चेन्नईत दाखल झाला आहे. पण वनडे मालिकेआधी भारतीय संघाला मोठा धक्का बसला आहे. भारताचा मुख्य गोलंदाज भुवनेश्वर कुमार पुन्हा एकदा जखमी झाला आहे. यासंदर्भात भारतीय क्रिकेट नियामक मंडळ बीसीसीआयने शनिवारी भुवनेश्वरच्या दुखापती संदर्भात एक पत्रक प्रसिद्ध केले आहे. त्यामुळे आगामी वनडे मालिकेसाठी भुवनेश्ववर कुमारच्या जागी शार्दुल ठाकूरचा संघात समावेश करण्यात आल्याचे बीसीसीआयने प्रसिद्धी पत्रकात म्हटले आहे.

आगामी वनडे साठी भारतीय संघ पुढील प्रमाणे विराट कोहली (कर्णधार), रोहित शर्मा (उपकर्णधार), मयांक अग्रवाल, के.एल.राहुल, श्रेयस अय्यर, मनीष पांडे, ऋषभ पंत (विकेटकिपर), शिवम दुबे, केदार जाधव, रविंद्र जडेजा, युजवेंद्र चहल, कुलदीप यादव, दीपक चाहर, मोहम्मद शमी, शार्दुल ठाकूर.