भारतीय सैन्यांवर पाकिस्तानी सैनिकांकडून पुन्हा गोळीबार !

श्रीनगर-जम्मू-काश्मीरमधील नियंत्रण रेषेवर पाकिस्तानच्या कुरापत्या नेहमीच्याच झाल्या आहेत. आज देखील पाकिस्तानी सैन्याने सीमा भागात गोळीबार केला. नौशेरा सेक्टरमध्ये पाक सैन्याने गोळीबार केला आहे. पूँछ जिल्ह्यात सीमेलगत असलेल्या दोन ठिकाणांवरही पाक सैन्याने काल गोळीबार केला होता. सीमेलगत असलेल्या अनेक भागांमध्ये पाकिस्तानी सैन्याकडून गेल्या ८ दिवसांपासून सतत गोळीबार सुरू आहे. यामुळे सीमेवर तणावाची परिस्थिती निर्माण झाली आहे.

पाकिस्तानी सैन्याने आज नौशेरा सेक्टरमध्ये भारतीय लष्कराच्या ठिकाणांवर मोर्टारने हल्ला केला. यानंतर भारतीय जवानांनीही त्यांना दणक्यात उत्तर दिले. पाककडून सीमेवर सुरू असलेल्या गोळीबाराच्या आड भारतात दहशतवाद्यांच्या घुसखोरीचा संशय व्यक्त करण्यात येतोय. यामुळे भारतीय लष्कराच्या जवानांना सीमेवर सतर्कतेचे आदेश देण्यात आलेत.

पाकिस्तानी सैन्याने नियंत्रण रेषेलगत आघाडीवर आसलेल्या भारतीय लष्कराच्या चौक्या आणि सीमावर्ती भागातील गावांना गोळीबाराचे लक्ष्य केले आहे. यात आतापर्यंत भारताची कुठलीही जीवितहानी झालेली नाही. पण गेल्या आठवड्यात पाक सैन्याने पूँछमध्ये नियंत्रण रेषेवर केलेल्या गोळीबारात बीएसएफचा एक जवान शहीद आणि एका मुलीचा मृत्यू झाला होता. गेल्या आठवड्यात पाक सैन्याने पूँछ आणि राजौरीमध्ये केलेल्या गोळीबाराला भारतीय लष्कराने दणक्यात उत्तर दिले. या कारवाईत पाक सैन्याची ७ ठाणी उद्ध्वस्त करण्यात लष्कराला यश आले. यात पाकचे अनेक सैनिक ठार झालेत. भारताच्या या कारवाईनंतर पाक सैन्याकडून आता नियंत्रण रेषेवर इतर ठिकाणीही गोळीबार करण्यात येतोय.