भिडेवाडा होणार राष्ट्रीय स्मारक

पुणे । महात्मा फुले आणि सावित्रीबाई फुले यांनी पुण्यातील भिडेवाडा येथे पहिली मुलींची शाळा सुरू केली. त्यामुळे भिडेवाड्याचे राष्ट्रीय स्मारक म्हणून जतन व्हावे, यासाठी पालकमंत्री गिरीश बापट यांनी मंत्रालयात शनिवारी विशेष बैठक घेतली. भिडे वाडा राष्ट्रीय स्मारक होण्यासाठी कायदेशीर प्रक्रिया तातडीने सुरू करावी, अशी सूचना विधी व न्यायविभाग व पुणे महानगरपालिकेच्या अधिकार्‍यांना पालकमंत्री गिरीश बापट यांनी दिल्या.या बैठकीला राज्य सरकारच्या वतीने विधी व न्याय विभागाचे उपसचिव पाटील, नगरविकास विभागाचे संजय गोखले, महसूल व वनविभागाचे सहसचिव गावडे, महापालिका उपायुक्त सतीश कुलकर्णी, तसेच स्मारक समितीच्या वतीने नगरसेवक महेश लडकत यांच्यासह सबंधीत अधिकारी उपस्थित होते.

2011 मध्ये तत्कालीन सरकारी वकिलांनी भूमिसंपादन अधिकार्‍यांना दिलेल्या पत्रामुळे भिडेवाडा राष्ट्रीय स्मारक करण्यासाठी लागणार्‍या जागेचा ताबा देण्याची प्रक्रिया रखडली आहे, असे बापट यांच्याशी झालेल्या या चर्चेतून निदर्शनास आले. त्यामुळे या प्रकारातून तातडीने मार्ग काढण्याच्या सूचना पालकमंत्र्यांनी विधी व न्याय खात्याला दिली. संबंधित पत्रावर विधी व न्याय खात्याचे मत लवकरात लवकर कळवावे, अशी सूचना ही बापट यांनी यावेळी केली. सरकारी वकिलांशी चर्चा करून याबाबत माहिती देण्याचे विधी व न्याय विभागाच्या अधिकार्‍यांनी बापट यांना सांगितले.

दिरंगाई खपवून घेणार नाही
भिडेवाडा हे राष्ट्रीय स्मारक आहे. हा विषय सर्वांसाठी महत्वाचा आहे. या आधी या संदर्भात काय-काय कामे झाली याची माहिती एकत्र करून मला द्यावी, असा आदेश बापट यांनी या बैठकीत दिला. या विषयाची कायदेशीर प्रक्रिया आणि त्या अनुषंगाने जागा ताब्यात घेण्याची प्रक्रिया या पुढील काळात कमीत कमी वेळेत होईल याबाबत नियोजन करा, अशा सूचना बापट यांनी अधिकार्‍यांना दिल्या. यावेळी भिडेवाड्यासंदर्भात 2011 नंतरच्या काळात झालेली दिरंगाई समजून घेऊन त्याबाबत बापट यांनी तीव्र नापसंती व्यक्त केली. अशी दिरंगाई यापुढे खपवून घेणार नाही, असेही बापट यांनी यावेळी सांगितले.