भिवंडीत पालिका निवडणुकीच्या वादातून संभावित उमेदवाराच्या हत्येचा कट उघड 

भिवंडी (रतनकुमार तेजे) : भिवंडी निजामपूर शहर महानगर पालिका निवडणुकीचे बिगुल वाजल्याने राजकीय वातावरण तापले आहे. राजकीय पक्षांचे नेते, कार्यकर्ते आमनेसामने भिडत असून एकमेकांचे जीव घेण्याचे प्रकार घडत आहे. काँग्रेसचे  पालिका गटनेते मनोज म्हात्रे यांची हत्याही राजकीय वादातून झाल्याची घटना ताजी असतानाच प्रभाग क्र.२ मिल्लतनगर येथून निवडणूक लढवण्यासाठी ईच्छुक असलेल्या संभावित उमेदवाराची हत्या करण्याचा कट विद्यमान महापौर ,स्थायी समिती सभापती ,नगरसेवक यांनी अन्य १० जणांच्या साथीने रचल्याचे उघड झाल्याने शहरात भीतीचे वातावरण पसरले आहे.या प्रकरणी निजामपूर पोलीस ठाण्यात गुन्हा दाखल केला आहे.सभापती इमरान वली मोहम्मद खान,काँग्रेस नेता मेहबूब उर्फ बबलू अंसारी ,उपमहापौर अहमद हुसेन सिद्दीकी ,भरत पवार ,फिरोज डायमंड ,अर्शद अंसारी व त्यांचे चार अनोळखी साथीदार असे गुन्हा दाखल झालेल्या हत्येच्या कटातील आरोपींची नांवे आहेत.यातील इमरान खान खान याने त्याची पत्नी व अहमद सिद्दीकी ,मेहबूब अंसारी आदींचे पॅनल तयार केले आहे.या पॅनलच्या विरोधात समाजसेवक हमीद सत्तार शेख यांनी पॅनल तयार करून निवडणुकीची तयारी सुरु केली आहे.हमीद शेख यांच्या पॅनलकडून आपल्या वर्चस्वाला धोका निर्माण होवू शकतो अशी भीती वाटू लागल्याने त्याला कायमचे संपवण्याचा कट रचण्यात येवून त्यासाठी अंबरनाथ येथील गुंडाना सुपारीही दिली होती.या त्रिकुटाकडून हमीद शेख ठाण्याच्या ज्ञानसाधना कॉलेजमध्ये लिपिकाचे काम करीत असल्याने त्याला रस्त्यातच ठार मारण्याचा कट रचण्यात आला होता.या हत्येच्या कटाचे मोबाईल रेकॉर्डिंग हमीद शेख यांचा समर्थक ननका गुप्ता याने उपलब्ध केल्याने खुनाच्या कटाची घटना सुदैवाने उघडकीस आल्याने मनोज म्हात्रेंसारखी घटनेची पुनरावृत्ती टळली आहे.