भुसावळातील टँकर चालकावर तलवार हल्ला ; दोघा आरोपींना अटक

भुसावळ- पूर्व वैमनस्यातून शहरातील टँकर चालकावर तलवारीने हल्ला केल्याची घटना नगराध्यक्ष रमण भोळे यांच्या काच बंगल्यामागील विहिरीवर शनिवारी दुपारी साडेतीन वाजेच्या सुमारास घडली होती. हल्ल्यानंतर हल्लेखोर पसार झाले होते. शहर पोलिसांनी गोपनीय माहितीच्या आधारे दोघांच्या मुसक्या आवळल्या असून अन्य पाच संशयीतांचा कसून शोध सुरू आहे.

गोपनीय माहितीवरून आवळल्या मुसक्या
सामाजिक कार्यकर्ते सतीश सपकाळे यांच्या टँकवर चालक असलेल्या विकास देविदास सपकाळे (40, भोई नगर, भुसावळ) यांच्यावर शनिवारी दुपारी साडेतीन वाजेच्या सुमारास सात संशयीतांनी तलवार हल्ला केल्याने सपकाळे गंभीर जखमी झलो होते. या प्रकरणी भावेश कांतीलाल दंडगव्हाळ (23, शिव कॉलनी, भुसावळ) व अमोल चौधरी यांना यावल नाका परीसरातून रविवारी अटक करण्यात आली. . दरम्यान, जखमी विकास सपकाळे यांच्यावर गोदावरी रुग्णालयात उपचार सुरू असून त्यांच्या प्रकृतीत सुधारणा असल्याचे वैद्यकीय सूत्रांनी सांगितले.

यांनी आवळल्या आरोपींच्या मुसक्या
ही कारवाई पोलिस अधीक्षक डॉ.पंजाबराव उगले, अपर पोलिस अधीक्षक लोहित मतानी, उपविभागीय पोलीस अधिकारी गजानन राठोड, पोलिस निरीक्षक बाबासाहेब ठोंबे यांच्या मार्गदर्शनाखाली पोलिस उपनिरीक्षक नाना सुर्यवंशी, हवालदार सय्यद वली, शंकर पाटील, साहिल तडवी, सुनील सैंदाने, संजय बडगुजर, मोहन पाटील, समाधान पाटील आदींच्या पथकाने केली.