भुसावळातील महावितरणच्या अधिकार्‍यांवर गुन्हे दाखल करण्यासाठी पोलिस अधीक्षकांना निवेदन

भुसावळ : आजीच्या दशक्रिया विधीसाठी आलेल्या तरुणाला घराच्या समोरून गेलेल्या उच्च दाबाच्या विद्युत तारेचा धक्का लागला होता. या घटनेत गंभीर जखमी झाल्यानंतर तरुणाचा उजवा हात कायमचा निकामी झाला होता. वीज महाविरण विभागाच्या हलगर्जीपणामुळे ही घटना घडल्याने संबंधित अधिकार्‍यांवर गुन्हे दाखल करण्यात यावे, अशी मागणी जळगाव जिल्हा पोलिस अधिक्षक डॉ.प्रवीण मुंढे यांच्याकडे करण्यात आली आहे.

तरुणाचा दुर्घटनेत हात निकामी
भुसावळ येथील रहिवासी केशव भाईदास पाटील हे आपल्या कुटुंबियांसह पुण्यात वास्तव्याला आहे. खाजगी व्यवसाय करून ते आपला उदरनिर्वाह करतात. त्यांची आई सुमन पाटील यांचे 21 जून रोजी निधन झाले होते. त्यामुळे केशव पाटील हे पत्नीसह अथर्व व ऋषीकेश यांच्यासह भुसावळ येथे आले होते. 30 जून रोजी त्यांच्या आईचा दशक्रिया विधी असल्याने केशव पाटील, त्यांची पत्नी आणि अथर्व पाटील हे भुसावळ येथे थांबून होते. 29 जून रोजी दुपारी दीड वाजेच्या सुमारास त्यांनी कार्यक्रमासाठी पाण्याच्या टँकर बोलावला होता. खाली टँकर वाल्याने आवाज दिला. त्यावेळी अर्थव हा गच्चीवरून खाली डोकावून पाहत असतांना घराच्या समोरून गेलेल्या उच्च दाबाची विद्यूत तारेला त्याचा हात लागल्याने विजेचा जोरदार धक्का लागला. त्यावेळी केशव पाटील हे त्याच्या मागेच होते. विजेचा जोराचा धक्का लागताच केशव पाटील यांनी कॉटवरील उशीच्या सहाय्याने अथर्वला पुश केले त्यामुळे अथर्व हा बाजूला पडला व केशव हे विरूध्द दिशेने पडले. त्यामुळे अथर्व बचावला. दरम्यान या घटनेत अथर्वचा उजवा हात पुर्णपणे जळाल्याने निकामी झाला तर उजव्या पायाची मांडी गंभीररीत्या जखमी झाली.

उजवा हात पूर्णपणे निकामी
अर्थवला तातडीने जळगाव येथील खाजगी रुग्णालयात उपचारार्थ दाखल करण्यात आले आहे. अथर्वचा महत्वाचा उजवा हात निकामी झाल्याने मोठे संकट पाटील कुटुंबावर कोसळले आहे. महावितरणच्या हलगर्जीपणामुळे मुलाच्या हाताचे नुकसान झाले असल्याचा आरोप केशव पाटील यांनी केला आहे. महावितरण कंपनीच्या संबंधित अधिकार्‍यांवर गुन्हे दाखल करण्यात यावी, अशी मागणीच त्यांनी जिल्हा पोलिस अधीक्षक डॉ.प्रवीण मुंढे यांच्याकडे निवेदनाद्वारे केली असून मुलाच्या नुकसानीची भरपाई महावितरण कंपनीने द्यावी, अशीदेखील मागणी केली आहे.