भुसावळात उद्या रन भुसावळ रन स्पर्धेतील स्पर्धकांना कीटचे वाटप

भुसावळ : शहरात जिल्हा पोलिस दलातर्फे ‘रन भुसावळ रन’ स्पर्धेर्चे 5 जानेवारी रोजी आयोजन करण्यात आले असून निरामय व सृदृढ आरोग्यासाठी स्पर्धकांसह भुसावळकरदेखील पहाटेच्या आल्हाददायी वातावरणात धावणार आहेत. स्पर्धेसाठी सुमारे अडीच हजार स्पर्धकांनी नोंदणी केली असून शनिवार, 4 जानेवारी रोजी सकाळी 11 ते 5 या वेळात शहरातील संतोषी माता हॉलमध्ये नाव नोंदलेल्यांना स्पर्धकांना टी शर्ट व कीटचे वाटप करण्यात येणार असून त्यासाठी पावती आणणे गरजेचे असल्याचे आयोजकांनी कळवले आहे. या स्पर्धेसाठी आमदार संजय सावकारे, सिद्धीविनायक ग्रुप, बियाणी एज्युकेशन व गोदावरी फाऊंडेशनचे सहकार्य लाभत आहे.

उद्या कीटचे होणार वाटप
स्पर्धेसाठी नाव नोंदणी केलेल्या स्पर्धकांना 4 जानेवारी रोजी सकाळी 11 ते दुपारी चार दरम्यान शहरातील संतोषी माता सभागृहात कीटचे वाटप होणार आहे. स्पर्धेसाठी नाव नोंदणीची पावती दाखवून कीट न्यावी, असे आवाहन आयोजकांनी केले आहे.

तीन गटात स्पर्धा : असा आहे मार्ग
ही स्पर्धा तीन, पाच व दहा किलोमीटर अंतरासाठी होणार आहे. तीन किलोमीटर अंतरासाठी डॉ.बाबासाहेब आंबेडकर मैदानापासून लोखंडी पूल, अष्टभुजा देवी मंदिर, नवशक्ती आर्केड पासून युटर्न घेऊन पुन्हा डॉ. आंबेडकर मैदान तर पाच किलोमीटर अंतरासाठी डॉ.बाबासाहेब आंबेडकर मैदान (डीएस ग्राऊंड) पासून लोखंडी पूल, अष्टभुजा देवी मंदिर, नवशक्ती आर्केड, हॉटेल हेवन पासून युटर्न घेत पुन्हा मैदान तर 10 किलोमीटर अंतरासाठी डॉ.बाबासाहेब आंबेडकर मैदानापासून लोखंडी पूल, अष्टभुजा देवी मंदिर, नवशक्ती आर्केड, हॉटेल हेवनपासून युटर्न घेत वसंत टॉकीज रिक्षा थांबा, दोन नंबरचा पेट्रोल पंपाजवळील डाव्या बाजूला वळत सरदार वल्लभभाई पटेल पुतळा, कोनार्क हॉस्पीटल, वाय पॉइंटपासून युटर्न घेत पुन्हा डी.एस.ग्राऊंड असा स्पर्धेचा मार्ग राहणार आहे. 10 किलोमीटर अंतरातील स्पर्धकांनी 5 जानेवारी रोजी पहाटे 5.15 वाजता उपस्थित रहावे तसेच सहा वाजता या स्पर्धेला सुरुवात होईल तसेच 5 किलोमीटर अंतरातील स्पर्धकांनी पहाटे 5.40 वाजता उपस्थित रहावे व 6.20 वाजता स्पर्धेला सुरुवात होणार असून 3 किलोमीटर अंतरासाठी 6.15 ला उपस्थित राहिल्यानंतर सात वाजता स्पर्धेला मान्यवरांच्या हस्ते हिरवी झेंडी दाखवून सुरूवात होईल, असे आयोजकांनी कळवले आहे.

या मान्यवरांची स्पर्धेसाठी राहणार उपस्थिती
स्पर्धेसाठी जिल्हाधिकारी डॉ.अविनाश ढाके, जिल्हा पोलिस अधीक्षक डॉ.पंजाबराव उगले, ऑर्डनन्स फॅक्टरीचे जी.एम., आमदार संजय सावकारे, सिद्धीविनायक ग्रुपचे चेअरमन कुंदन ढाके, माजी खासदार डॉ.उल्हास पाटील, दीपनगरचे अधिकारी, डीआरएम विवेककुमार गुप्ता, नगराध्यक्ष रमण भोळे, पालिका मुख्याधिकारी करुणा डहाळे यांच्यासह अन्य मान्यवरांची उपस्थिती राहणार आहे.

स्पर्धा यशस्वीसाठी यांचे परीश्रम
स्पर्धा यशस्वीतेसाठी आयोजन समितीतील पोलिस उपअधीक्षक गजानन राठोड, शहर निरीक्षक बाबासाहेब ठोंबे, बाजारपेठ निरीक्षक दिलीप भागवत, तालुक्याचे निरीक्षक रामकृष्ण कुंभार, बाजारपेठचे सहाय्यक निरीक्षक अनिल मोरे, वाहतूक शाखेचे उपनिरीक्षक के.टी.सुरळकर, सिद्धीविनायक ग्रुपचे संचालक यतीन ढाके, विकास पाचपांडे, शुभम महाजन, अजय भोळे, समीर पाटील, प्रवीण वारके, अ‍ॅड.तुषार पाटील, अनिल आर.चौधरी,कुंदन पाटील, क्रीडा शिक्षक रमण भोळे, मनीष नेमाडे, वरूण इंगळे, प्रवीण पाटील, डॉ.तुषार पाटील, चेतन पाटील, रणजीत खरारे, विघ्नहर्ता पब्लिकेशनचे रवी निमाणी आदी परीश्रम घेत आहेत.