भुसावळात बनावट डिझेल कारखाना उद्ध्वस्त, 3 अटकेत

320 लिटर डिझेल जप्त ; पाच आरोपींविरुद्ध गुन्हा ; तिघा आरोपींना 11 पर्यंत पोलिस कोठडी ; राज्यभरात पाळेमुळांची शक्यता

भुसावळ- तालुक्यातील कुर्‍हेपानाचे ते गोजोरा रस्त्यावरील काळ्या ऑईलपासून बेकायदा बायोडिझेल बनवण्याच्या कारखान्यावर पोलिस उपअधीक्षक गजानन राठोड यांच्या मार्गदर्शनाखाली पथकाने धाड टाकून कारवाई करीत 21 हजार 600 रुपये किंमतीचे 360 लिटर डिझेल जप्त करीत कारखाना मालकासह पाच जणांविरुद्ध गुन्हा दाखल केला होता. या प्रकरणी टाटा सुमो चालकासह अन्य दोघा चालक व क्लीनरला अटक करण्यात आल्यानंतर त्यांना शनिवारी न्यायालयात हजर केल्यानंतर न्यायालयाने 11 पर्यंत पोलिस कोठडी सुनावली. दरम्यान, शहरात गेल्या अनेक दिवसांपासून बेकायदा बायोडिझेल बनवले जात असताना व त्याची बेकायदा विक्री होत असताना पोलिस प्रशासन अनभिज्ञ कसे? याबाबत प्रश्‍नचिन्ह उपस्थित होत असून या बनावट डिझेलची राज्यभरात पाळेमुळे खोलवर रूजल्याची शक्यता आहे तर आरोपींच्या अटकेनंतरच याचा उलगडा होणार आहे.

वाहन तपासणीनंतर झाला गुन्ह्याचा उलगडा
पोलिस उपअधीक्षक कार्यालयाजवळून जाणार्‍या टाटा सुमो (क्रमांक एम.एच.19 वाय.5303) मधून 360 लिटर डिझेलची बेकायदा वाहतूक होत असताना शहर वाहतूक शाखेचे सहाय्यक पोलिस निरीक्षक दीपक गंधाले तसेच तालुका पोलिस ठाण्याचे निरीक्षक चंद्रकांत कुंभार आदींच्या पथकाने सुमो चालक संजय दगा पाटील (भास्कर नगर, पाचोरा) यास ताब्यात घेतले होते. पोलिस चौकशीत आरोपीने हे डिझेल शहरातील शिवाजी कॉम्प्लेक्समधील मनीष ट्रॅव्हल्सचे मालक सतीश घुले यांच्या सांगण्यावरून कुर्‍हेपानाचे ते नशिराबाद दरम्यान असलेल्या गोजोरे रस्त्यावरील संदेश फॅक्टरीतून आणायचे सांगितल्याची कबुली दिल्यानंतर पोलिस पथकाने सापळा रचत संदेश एनर्जीस फॅक्टरीत शुक्रवारी दुपारी छापा टाकून कंपनीच्या आवारातील लोखंडी पाच टाक्यांमध्येे मॉशरॉईजर ऑईल, लाईट डिझेल ऑईल व खराब ऑईलने भरलेल्या 200 लिटरने भरलेल्या टाक्या तसेच पॅरालायझेस नावाची मशीन व लाईट डिझेल भरलेला टँकर (क्रमांक एम.एच.04 एफ.पी.4650) आढळल्याने तो पोलिसांनी जप्त केला होता. संशयीत आरोपी बाजार भावाच्या दरापेक्षा सुमारे चार रुपये कमी दराने हे डिझेल विक्री करीत असल्याचे पोलिस सूत्रांनी सांगितले.

पाचविरुद्ध गुन्हा ; तिघांना अटक
भुसावळ तालुका पोलिस ठाण्याचे पोलिस उपनिरीक्षक दिलीप विक्रम पाटील यांनी शुक्रवारी रात्री उशिरा मनीष ट्रॅव्हल्सचे मालक सतीश भिका घुले (भुसावळ) यांच्यासह फॅक्टरी मालक संदेश सुरेश अग्रवाल (रा.पाचोरा, जि.जळगाव), फिरोजखान मोहमदखान (रजा नगर, भुसावळ) व मोहमदखान तुरखा खान (मुस्लिम कॉलनी, भुसावळ), टाटा सुमो चालक संजय दगा पाटील (पाचोरा) यांच्याविरुद्ध बाजारपेठ पोलिसात गुन्हा दाखल केला तर सुमो चालक सुदेश अग्रवाल, टँकर चालक फिरोज खान व क्लीनर मोहमद खान यांना अटक करण्यात आली. तिघाही आरोपींना शनिवारी न्यायालयातर हजर केल्यानंतर त्यांना 11 फेब्रुवारीपर्यंत पोलिस कोठडी सुनावण्यात आली तर फॅक्टरी मालकांसह दोघांचा पोलिसांकडून कसून शोध सुरू आहे. दरम्यान, अटकेतील चालक संजय याने मनीष ट्रॅव्हल्सवर चालक म्हणून कामाला असल्याची कबुली दिली आहे.

राज्यभरात पाळेमुळे असण्याची शक्यता
भुसावळ शहराजवळ बनावट डिझेल बनवले जात असताना पोलिस प्रशासनाला याबाबत भनक कशी लागली नाही? याबाबत आश्‍चर्य व्यक्त केले जात आहे शिवाय बनावट डिझेल बनवणारी टोळी असल्याची व राज्यभरात तिचे नेटवर्क असल्याची शक्यता नाकारता येत नाही. कारखान्यात बनावट डिझेल बनवण्यासाठी लागणारे कच्चे साहित्य कुठून येते होते शिवाय त्याचा पुरवठा कोण करत होते तसेच खरेदीदार नेमके कोण-कोण याबाबत चौकशी होणे गरजेचे आहे. या प्रकरणाचा पोलिसांनी खोलवर जावून तपास करण्याची मागणी होत आहे.