भुसावळ गटनेता प्रकरणी 8 जानेवारी रोजी सुनावणी

भुसावळ:  भाजपाकडे पुरेसे संख्याबळ असतांनाही भाजपाच्या चिन्हावर निवडून न आलेल्या व अपक्ष नगरसेवक असलेल्या हाजी मुन्ना इब्राहिम तेली यांना पालिकेतील सत्ताधार्‍यांनी गटनेता बनवल्याने सर्वांना अपात्र करण्यात यावे, अशी याचिका पालिकेतील विरोधी पक्ष असलेल्या जनआधार विकास पार्टीने जिल्हाधिकार्‍यांकडे दाखल केली होती. या याचिकेची दखल घेत जिल्हाधिकार्‍यांनी लोकनियुक्त नगराध्यक्षांसह भाजपाच्या 29 नगरसेवकांना अपात्र का करण्यात येवू नये? या आशयाची नोटीस बजावली होती. 11 रोजी सुनावणीची तारीख दिल्यानंतर 18 डिसेंबर रोजी पुन्हा तारीख देण्यात आली होती तर सोमवार, 18 रोजी भाजपाचे गटनेता मुन्ना तेली व अ‍ॅड.बोधराज चौधरी तारखेस उपस्थित राहिल्यानंतर पुन्हा 8 जानेवारी सुनावणीची तारीख देण्यात आल्याचे सूत्रांनी सांगितले. दरम्यान, निकालाकडे भुसावळकरांचे लक्ष लागले आहे.