भुसावळ पालिकेतील घोटाळे ; खंडपीठात अहवाल द्या
औरंगाबाद खंडपीठाचे जळगाव आर्थिक गुन्हे शाखेच्या निरीक्षकांना आदेश ; 23 ऑगस्टला सुनावणी
भुसावळ- भुसावळ पालिकेतील घनकचरा प्रकल्पासह, बाजार मक्ता फी, इंग्लिश स्पीकींग क्लास, विविध रस्त्यांचे डांबरीकरण व अन्य नऊ प्रकरणांमध्ये मोठ्या प्रमाणावर भ्रष्टाचार झाल्याची तक्रार दाखल झाल्यानंतर खंडपीठात हे गुन्हे सीबीआयकडे तपासासाठी वर्ग करण्याची मागणी करण्यात आली होती. खंडपीठात या प्रकरणाची सुनावणी सुरू असताना 23 ऑगस्ट रोजी जळगाव आथिृक गुन्हे शाखेच्या अधिकार्‍यांनी आतापर्यंत केलेल्या तपासाचा अहवाल सादर करण्याचे आदेश दिले आहेत. दरम्यान, तब्बल पाच वर्षानंतरही या गुन्ह्यात शासन निधीच्या झालेल्या अपव्ययाची रीकव्हरी झालेली नाही शिवाय कुठल्याही आरोपींना अद्यापही अटक करण्यात यश आले नसल्याने आश्‍चर्य व्यक्त होत आहे शिवाय या प्रकरणातील तीन गुन्हे हे गुन्ह्याच्या प्रकारात मोडले जात नसल्याचे प्रतिज्ञापत्र खंडपीठात सादर करण्यात आले आहे.
नऊ प्रकरणांमध्ये अपहार झाल्याची तक्रार
भुसावळातील पेन्शनर्स असोसिएशनचे अध्यक्ष एस.एल.पाटील यांनी भुसावळ पालिकेत तब्बल नऊ प्रकरणांमध्ये लाखो रुपयांचा भ्रष्टाचार झाल्याचा आक्षेप घेत सर्वोच्च न्यायालयात धाव घेतली होती मात्र सर्वोच्च न्यायालयाने उच्च न्यायालयात जाण्याचा सल्ला दिल्यानंतर पाटील यांनी औरंगाबाद खंडपीठात रीट दाखल केल्यानंतर नऊ गुन्ह्यांचा तपास सीबीआयकडे वर्ग करण्याबाबत रीट याचिका दाखल केली होती शिवाय बाजारपेठ पोलिसात सुरूवातीला नऊ गुन्हे दाखल झाल्यानंतर फसवणुकीचा गुन्हा हा जळगाव आर्थिक गुन्हे शाखेकडे वर्ग करण्यात आला होता. दरम्यानच्या काळात अनेक नगरसेवकांचे जाब-जवाब नोंदवण्यात आले मात्र पाच वर्षांच्या काळात अद्यापपर्यंत एकालाही अटक झाली नाही शिवाय शासनाच्या निधीची रीकव्हरीदेखील झाली नाही हेदेखील विशेष !
तीन प्रकरणांमध्ये तपासाधिकार्‍यांचे शपथपत्र
आर्थिक गुन्हे शाखेने तीन गुन्ह्यांचा तपास करताना ही प्रकरणे गुन्ह्यात मोडली जात नसल्याचे शपथपत्र खंडपीठात सादर केले होते. खंडपीठात या प्रकरणाची सुनावणी सुरू असतानाच खंडपीठाने जळगाव पोलिस अधीक्षकांना या प्रकरणांमध्ये वैयक्तिक लक्ष घालण्याचे आदेश दिले होते. 2 ऑगस्ट रोजी पुन्हा औरंगाबाद खंडपीठात न्या.टी.व्ही.नलावडे व न्या.के.के.सोनवणे यांच्या न्यायासनासमोर सुनावणी झाल्यानंतर जळगाव गुन्हे शाखेच्या तपासाधिकार्‍यांना 23 ऑगस्ट रोजी गुन्ह्याची कागदपत्रे व तपासाचा प्रोग्रेस रीपोर्टसह हजर राहण्याचे बजावले आहे. तक्रारदार एस.एल.पाटील यांच्यातर्फे अ‍ॅड.योगेश पाटील तर राज्य शासनातर्फे अ‍ॅड.एम.एम.नेर्लिकर व सीबीआयतर्फे अ‍ॅड.एस.एस.देवे काम पाहत आहेत.
…तर नगरसेवकांच्या अडचणीत होवू शकते वाढ
भुसावळ पालिकेतील घनकचरा प्रकल्पासह, बाजार मक्ता फी, इंग्लिश स्पीकींग क्लास, विविध रस्त्यांचे डांबरीकरण यासह अन्य नऊ प्रकरणांबाबत दाखल गुन्ह्यांमध्ये अनेक विद्यमान नगरसेवकांसह माजी नगरसेवकांविरुद्ध गुन्हे दाखल आहेत. जळगाव आर्थिक गुन्हे शाखेकडून गेल्या पाच वर्षांपासून तपास सुरू असताना अद्याप कुणालाही अटक नाही मात्र आता खंडपीठाने पोलिस अधीक्षकांना या प्रकरणात लक्ष घालण्याचे आदेश दिल्यानंतर निवडणुकीच्या तोंडावर संशयीत आरोपी असलेल्या माजी नगराध्यक्षांसह आजी-माजी नगरसेवकांवर कारवाई होते वा नाही? याकडे सुज्ञ शहरवासीयांचे लक्ष लागले आहे. दरम्यान, तपासाधिकारी व निरीक्षक दत्तात्रय परदेशी म्हणाले की, नुकताच आपण या शाखेचा पदभार घेतला असून कागदपत्रांची बारकाईने तपासणी करीत असून त्यानंतर कारवाईची दिशा ठरवली जाईल, असे ते म्हणाले.