भुसावळ शहरात नाताळनिमित्त चर्च सजले

ख्रिसमस ट्री, सॅन्ताक्लॉजच्या कपड्यांना मोठी मागणी

भुसावळ- प्रभू येशूंचा जन्मदिवस ‘ख्रिसमस’ अर्थात ‘नाताळ’ हा सण मंगळवारी साजरा होत आहे. हा सण ख्रिस्ती बांधवांकडून मोठ्या प्रमाणात साजरा होत असला तरी अन्य सर्वधर्मीय नागरीकांनीही या सणाला आपलेसे केले आहे. ख्रिस्ती बांधवांच्या पवित्र नाताळ सणानिमित्त शहरातील विविध चर्चमध्ये सणाची तयारी सुरू असून चर्चना आकर्षक विद्यूत रोषणाई केली जात आहे.

सणासाठी बाजारपेठही सजली
या सणाच्या निमित्ताने सजवले जाणारे ख्रिसमस ट्री, सॅन्ताक्लॉजचे कपडे, गिफ्ट याचे लहानांनाच काय मोठ्यांनाही आकर्षण असते. अजूनही पालक लहान मुलांच्या उशाला त्यांचे आवडते गिप्ट ठेवतात आणि सॅन्ताक्लॉजच्या आठवणीत लहान मुले रंगून जातात. नाताळ आता दोन दिवसांवर आल्याने ख्रिस्ती बांधवांच्या घराघरात सणाच्या स्वागताची जय्यत तयारी सुरु आहे. शहरातील सर्व चर्चना रंगरंगोटी व विद्यूत रोषणाई करण्यात आली आहे. तर सणासाठी बाजारपेठदेखील सजली आहे.

बेकर्‍यांमध्ये विविध फ्लेव्हरचे केक उपलब्ध
शहरातील बाजारपेठेत लहान मोठ्या आकाराचे ख्रिसमस ट्री, जिंगलबेल्स, चांदण्या, सांताक्लॉजचे शर्ट, शुभेच्छापत्रे, सांताक्लॉज टोपी, कपडे, चॉकलेटस, कॅडबरी, सजावटीचे साहित्य, रंगीबेरंगी मेणबत्या आणि डिझायनर जिंगल बेल्सना अधिक मागणी आहे. या दिवशी केक कापले जात असल्याने बेकरीमध्ये विविध फ्लेवरमधले व विविध आकारातले साधे केक, पेस्ट्री केक सजले आहेत.