भूसंपादनासाठी टीडीआरचा प्रस्ताव

पुणे । लोहगाव विमानतळाचा विस्तार करण्यात येणार असून त्यासाठी लागणारी खासगी जमीन मालकांची जागा ताब्यात घेण्याचा निर्णय झाला आहे. या जागेच्या भूसंपादनासाठी मोठा खर्च अपेक्षित असून जागेचा मोबदला टीडीआर स्वरूपात देण्याच्या सूचना महापालिकेला देण्यात आल्या आहेत. त्यासाठीचा प्रस्ताव महापालिका तयार करून तो नगरविकास विभागाकडे सादर करण्यात येणार आहे. लोहगाव येथील विमानतळाचे विस्तारीकरण करण्याचा निर्णय सरकारने घेतला आहे. त्यासाठी केंद्रीय वाहतूक मंत्री नितीन गडकरी यांनी देखील एक वर्षांपूर्वी पुण्यात येऊन बैठक घेतली होती. या बैठकीमध्ये विमानतळाच्या विस्तारीकरणासाठी लगतची पंधरा एकर जागा ताब्यात देण्यास हवाई दलाने तत्वत: मान्यता दिली होती. तसेच विमानतळाच्या नऊशे मीटरच्या परिसरातील नो डेव्हलपमेन्टमधील खासगी जमीन मालकांची जागा ही ताब्यात घेण्याचा निर्णय राज्य सरकारने घेतला होता. त्यामुळे एअरपोर्ट अ‍ॅथॉरिटीकडून विमानतळ विस्तारीकरणाचा आराखडाही तयार करून तो मान्यतेसाठी पाठविण्यात आला. त्यास मान्यता देखील मिळाली. मात्र विस्तारीकरणासाठी आवश्यक असलेली जागा अद्याप ताब्यात येऊ न शकल्याने हे काम सुरू झाले नव्हते.

यामुळे या जागेऐवजी लोहगाव परिसरापासून आठ किलोमीटर अंतरावर असलेल्या भावडी गावातील 15 एकर जागा देण्याचा पर्याय जिल्हा प्रशासनाकडून ठेवण्यात आला आहे. मात्र त्यास हवाई दल तयार नाही. त्यामुळे या जागेचा तिढा सुटत नसल्यामुळे विस्तारीकरण करण्याचे काम रखडले आहे. यासंदर्भात हवाई दल, एअरपोर्ट ऍथॉरिटी ऑफ इंडिया आणि महसूल विभागाचे अधिकारी यांची एकत्रित मुख्यमंत्र्यांनी बोलवावी. त्यामध्ये यासंदर्भातील निर्णय घ्यावा, अशी विनंती जिल्हा प्रशासनाने मुख्यमंत्र्यांकडे केली होती. याविषयी नुकतीच जिल्हाधिकारी आणि मुख्यमंत्री यांची चर्चा झाली.

नव्वद टक्क्यांहून अधिक जागा पडून
लोहगाव विमानतळाच्या विस्तारीकरणासाठी वेकफिल्ड चौकातील इंडिया ऑइल कंपनीची पंधरा एकर जागा मिळावी, अशी मागणी एअरपोर्ट अ‍ॅथॉरिटीने केली आहे. परंतु या जागेच्या मोबदल्यात विमानतळाच्या नऊशे मीटरच्या परिसरात येणार्‍या जागेपैकी पंधरा एकर जागा मिळावी, असा आग्रह हवाई दलाने घेतला आहे. वास्तविक लोहगाव परिसरात हवाई दलाची जवळपास 2200 एकर जागा आहे. त्यापैकी नव्वद टक्क्यांहून अधिक जागा तशीच पडून आहे. तसेच हवाई दलाची जागा सरकारच्या दुसर्‍या म्हणजे एअरपोर्ट अ‍ॅथॉरिटीकडेच वर्ग होणार आहे. त्यामुळे हवाई दलाने आग्रह धरू नये. अथवा विमानतळाच्या परिसरातील जागा हवाई दलास हवी असल्यास त्या जागेचा मोबदल्यापोटी शंभर कोटी रुपयांहून अधिक निधी लागणार आहे.

खासगी जमीन मालकांची जागा
लोहगाव विमानतळाच्या विस्तारीकरणासाठी खासगी जमीन मालकांची जागा घेण्याचा विचार आहे. या जागेच्या मोबदला टीडीआर स्वरूपात देण्याचा विचार आहे. यासाठी टीडीआरचा प्रस्ताव महापालिकेने तयार करून तो नगरविकास विभागाकडे सादर करण्याच्या सूचना देण्यात आल्या आहेत.
– सौरभ राव, जिल्हाधिकारी