भूसंपादन न झाल्याने निगडी-मोशी रस्ता रखडला

आठ किलोमीटर लांबीच्या रस्त्याचे 80 टक्के काम पूर्ण

पिंपरी : निगडीतील भक्ती-शक्ती चौकातून थेट मोशी येथे पुणे-नाशिक रोडला जाण्यासाठी रस्ते बांधणीचे काम हाती घेण्यात आले. या आठ किलोमीटर लांबीच्या रस्त्याचे 80 टक्के काम पूर्णही झाले आहे. मात्र, केवळ सातशे मीटर लांबीचा रस्ता भूसंपादनामुळे होऊ न शकल्याने संपूर्ण रस्ताच लटकला आहे. पिंपरी-चिंचवड शहरात रस्त्यांचे जाळे निर्माण होत आहे. शहराच्या एका टोकापासून दुसर्‍या टोकापर्यंत जाण्यासाठी हे रस्ते फायदेशीर ठरत आहे. विविध ठिकाणी प्रशस्त रस्त्यांची कामे सुरू आहेत. ही कामे पूर्णत्त्वास गेल्यास वाहतूक कोंडी सुटण्यास मदत होणार आहे. मात्र, काही रस्त्यांची कामे विविध कारणांनी रखडली असून, संपूर्ण रस्त्याचा खोळंबा अशी स्थिती निर्माण झाली आहे.

त्रिवेणीनगरात भूसंपादन रखडले
निगडी परिसरातून थेट पुणे-नाशिक मार्गाला जाण्यासाठी निगडीतील भक्ती-शक्ती चौकापासून ते मोशीत पुणे-नाशिक महामार्गापर्यंत रस्त्याचे काम हाती घेण्यात आले होते. त्याचे कामही पूर्ण झाले़ मात्र, त्रिवेणीनगर येथे सातशे मीटर अंतरासाठीचे भूसंपादन रखडल्याने हा रस्ता अपूर्णावस्थेत आहे. हा आठ किलोमीटर लांबीचा रस्ता पूर्णत्त्वास गेल्यास मोठी अडचण दूर होणार आहे. मात्र, सातशे मीटरचा रस्ता भूसंपादनात अडकला आहे.

त्रिवेणीनगर चौक महत्त्वाचा
त्रिवेणीनगर चौकात मोठ्या प्रमाणात वाहतूक असते. तळवडे येथे आयटी पार्क असून, आयटी पार्ककडे निगडी परिसरातूनच मोठ्या प्रमाणात वाहने जात असतात. यासह तळवडे एमआयडीसी परिसरासह देहू तीर्थक्षेत्र असल्याने या परिसरात जाणार्‍या वाहनांची संख्याही अधिक आहे. ही सर्व वाहने त्रिवेणीनगर चौकातूनच जात असतात. त्यामुळे हा चौक वाहतुकीसाठी महत्त्वाचा आहे.