भोसरीतील दोघांची ऑनलाईन फसवणूक

पिंपरी-चिंचवड : दोन वेगवेगळ्या घटनांमध्ये भोसरीतील दोघांची ऑनलाईन फसवणूक झाल्याचे उघडकीस आले आहे. एकाला हॉलिडे पॅकेजचे आमिष दाखवून 20 हजाराला तर दुसर्‍यास एटीएम कार्ड संबंधी गोपनीय माहिती विचारून 15 हजाराला गंडा घातला आहे. या दोन्ही घटनांसंदर्भात भोसरी पोलिसांकडे 29 जुलैला फिर्याद दाखल झाली आहे. पोलिसांच्या माहितीनुसार, फिर्यादी सुहास महांबरे यांना राकेश शर्मा व अन्य दोन जणांनी मोबाईलवर संपर्क साधून हॉलिडे पॅकेजची माहिती दिली. त्यानंतर ऑनलाईन 20 हजार रुपये भरण्यास सांगितले. त्यानुसार फिर्यादीने ऑनलाईन रक्कम भरली. मात्र, कसलेही हॉलिडे पॅकेज त्यांना मिळाले नाही. फसवणूक झाली म्हणून त्यांनी राकेश वर्मा व अन्य दोन अज्ञात आरोपींविरोधात फिर्याद दिली आहे.

एटीएमची माहिती देणे भोवले
दुसर्‍या घटनेत फिर्यादी महेंद्र पाल यांना 29 जुलैला मोबाईलवरून संपर्क साधून अज्ञात भामट्यांनी एटीएम कार्डसंबंधी माहिती सांगण्यास भाग पाडले. बँकेचा अधिकारी बोलत असल्याचे सांगून आपले एटीएम कार्ड ब्लॉक झाले आहे, अशी भीती दाखवून एटीएम कार्डची माहिती घेतली. फिर्यादीच्या खात्यातून परस्पर 15 हजार रुपये दुसर्‍या खात्यात वर्ग झाले. आपल्या बँक खात्याची गोपनीय माहिती कोणाही अनोळखी व्यक्तीला देऊ नका, फसवणूक होण्याची शक्यता असते, असे वारंवार सूचित करुनही ऑनलाईन फसवणूक होण्याच्या घटना घडत आहेत. नागरिकांनी सतर्कता दाखवली तरच त्यावर नियंत्रण येऊ शकते, असे पोलिसांचे म्हणणे आहे.