‘भ्रष्टाचारमुक्त कारभार’ देण्याच्या आश्‍वासनाला भाजपकडून वाटाण्याच्या अक्षता
सव्वावर्षात चार नगरसेवकांवर गुन्हे दाखल
लोकप्रतिनिधींचा गुन्हेगारीकृत्यांमध्ये सहभाग
पिंपरी : पिंपरी-चिंचवड महापालिकेच्या निवडणुकीपुर्वी भारतीय जनता पक्षाने मतदारांना अनेक आश्‍वासने दिली होती. शास्तीकर माफी, अनधिकृत बांधकामे अधिकृत करणार आदी प्रमुख आश्‍वासने वारंवार दिली गेली होती. त्यापैकीच एक म्हणजे ‘निवडून आल्यावर आम्ही जनतेला भयमुक्त व भ्रष्टाचारमुक्त कारभार करून दाखवू’ असे आश्‍वासन दिले होते. सत्ता मिळून सव्वा वर्ष झाल्यावरही यातील कोणत्याच आश्‍वासनांची पुर्ती केली गेली नाही. उलट ‘भ्रष्टाचारमुक्त कारभार करून दाखवू’ असे म्हणताना भ्रष्टाचार केला गेला. भाजपाच्या अवघ्या सव्वा वर्षाच्या सत्ताकाळात चार नगरसेवकांवर गुन्हे दाखल झाले. यामध्ये काही गुन्हे गंभीर स्वरूपाचे असून, शहरातील वाढत्या गुन्हेगारीला खतपाणी घालणारे आहेत.
गुन्हेगारीचा मुद्दा ऐरणीवर
भाजपने भयमुक्त कारभार करण्याचे आश्‍वासन देऊनही काही उपयोग झाला नाही. गेल्या सोमवारी (4 रोजी) क्रीडा समिती सभापती संजय नेवाळे यांच्यावर हाणामारी आणि दुकानाच्या तोडफोडीचा गुन्हा दाखल झाला. त्यामुळे शहरातील वाढत्या गुन्हेगारीचा मुद्दा ऐरणीवर आला आहे. महापालिकेची सार्वत्रिक निवडणूक झाली. ‘भ्रष्टाचारमुक्त व भयमुक्त शहर’ असे नागरिकांना आश्‍वासन देऊन भाजपाने महापालिका निवडणुकीत बाजी मारली. गुन्हेगारीवर नियंत्रण आणण्यासाठी पोलीस आयुक्तालय गरजेचे असल्याने त्याबाबत पाठपुरावा झाला. पोलीस आयुक्तालयाचा प्रश्‍न मार्गी लागूनही लोकप्रतिनिधींकडून गुन्हेगारी स्वरूपाची कृत्ये घडत आहेत. लोकप्रतिनिधींचा गुन्हेगारी घटनांमधील वाढता सहभाग ही चिंतेची बाब बनली आहे. अन्यथा पोलीस आयुक्तालय होऊनही शहरवासीयांना भयमुक्त जीवन जगणे अशक्य असल्याच्या नागरिकांच्या प्रतिक्रिया आहेत.
विविध गुन्हे दाखल
लोकप्रतिनिधींवर गुन्हे दाखल होणे ही मोठी चिंताजनक गोष्ट आहे. क्रीडा समितीचे सभापती संजय नेवाळे, संत तुकारामनगर प्रभागाच्या नगरसेविका सुजाता पालांडे, संभाजीनगर प्रभागाचे नगरसेवक तुषार हिंगे, विशालनगर (वाकड) येथील नगरसेवक तुषार कामठे यांच्यावर विविध स्वरूपाचे गुन्हे दाखल झाले आहेत. हिंगे यांच्याविरुद्ध खुनाचा प्रयत्न केल्याचा गुन्हा दाखल आहे. पिंपळे निलख, विशालनगर, कस्पटे वस्ती येथून भाजपाच्या उमेदवारीवर निवडून आलेले नगरसेवक तुषार कामठे यांच्याविरोधात सांगवी ठाण्यात बनावट आणि खोटी कागदपत्रे सादर केल्याबद्दल फसवणुकीचा गुन्हा दाखल आहे. टपरीचालकास आत्महत्येस प्रवृत्त केल्याप्रकरणी संत तुकारामनगर (पिंपरी) येथील नगरसेविका सुजाता पालांडे यांच्याविरुद्ध नुकताच गुन्हा दाखल झाला आहे.