मंगला एक्स्प्रेसचा सतर्कतेमुळे अपघात टळला

कर्मचार्‍यांची सतर्कता ; नाशकात दुरुस्तीनंतर गाडी रवाना

भुसावळ :- अप 12618 मंगला एक्स्प्रेस नाशिक रेल्वे स्थानकात प्रवेश करीत असताना एका चाकाची स्प्रिंग निखळल्याचे वेळीच लक्षात आल्याने गाडीचा मोठा अपघात टळला. सोमवारी सकाळी 6.40 वाजेच्या सुमारास ही घटना घडली. मंगला-लक्षद्वीप ही एक्स्प्रेस नाशिक स्थानकात शिरत असतानाच बोगी क्रमांक बी-2 च्या खाली आवाज येत असल्याचे व गिट्टी उडत असल्याचे गाडीतील कंडक्टर व्ही.टी.मसराम यांच्या लक्षात आल्याने त्यांनी तत्काळ चेन पुलिंग करून गाडी थांबवली व गाडी खाली पाहिले असता एका चाकाची स्प्रिंग तुटून पिन निघाल्याचे लक्षात येताच त्यांनी सहकारी कंडक्टर यांना माहिती दिली. लोको पायलटलाही सूचना दिल्यानंतर गाडी पुढे नेण्यास धोका असल्याचे निष्पन्न झाल्यानंतर नियंत्रण कक्षाला माहिती कळवण्यात आली. सोमवारी सकाळी 10.30 वाजेच्या सुमारास काम पूर्ण केल्यानंतर एक्स्प्रेस मुंबईकडे रवाना करण्यात आली.