मंजुळा शेट्ये हत्त्याप्रकरणाची न्यायालयीन चौकशी करा

मुंबई : मुंबईच्या भायखळा कारागृहामध्ये मंजुळा शेट्ये या महिला कैद्याची निर्घृण हत्या करण्यात आली. कारागृह प्रशासनातील भ्रष्टाचाराविरूद्ध आवाज उठवल्यामुळेच त्यांची हत्त्या घडवून आणली गेल्याचा आरोप राष्ट्रवादी महिला काँग्रेसच्या प्रदेशाध्यक्षा चित्रा वाघ यांनी गुरूवारी एका पत्रकार परिषदेत केला. या प्रकरणाची महिला न्यायाधिशांमार्फत न्यायालयीन चौकशी करावी, अशी मागणीही त्यांनी केली.

पारदर्शक कारभाराची तळी उचलणाऱ्या सरकारने आता या खात्याचे संबंधित गृहराज्यमंत्री रणजीत पाटील यांचा राजीनामा घ्यावा तसेच या हत्त्येसाठी कारणीभूत असलेल्या अधिकारी व कर्मचाऱ्यांवर सदोष मनुष्यवधाचा गुन्हा दाखल करावा, असेही त्या म्हणाल्या. कारागृहातील कैद्यांना पुरवण्यात येणाऱ्या जेवणाच्या साहित्यामध्ये भ्रष्टाचार होत असल्याची बाब मंजुळा शेट्ये यांनी उघड केली होती. त्यातूनच दोन अंडी व पाच पावांचा हिशेब लागत नसल्याच्या किरकोळ कारणावरून कारागृहातील अधिकारी व कर्मचाऱ्यांच्या मारहाणीत मंजुळाचा संशयास्पद मृत्यू झाला असल्याचे वाघ यांनी सांगितले.

मंजुळा शेट्ये यांच्या हत्त्येनंतर कारागृहामधील इतर महिला कैद्यांनी कारागृहाच्या छतावर जाऊन आंदोलन केले होते. कारागृहाच्या आजूबाजूला असलेल्या इमारतीमधील लोकांनी याचे व्हिडियो शूटिंग केल्यामुळेच हे आंदोलन सर्वासमोर आले. शिवाय, या आंदोलनामुळे या प्रकरणातील सत्यही बाहेर आले आहे, असेही त्यांनी सांगितले.