मंजुळा शेट्ये हत्त्येप्रकरणी इंदुलकर व घरबुडवे निलंबित

मुंबई – मुंबईच्या भायखळा कारागृहात झालेल्या मंजुळा शेट्ये या कैद्याच्या हत्त्येप्रकरणी त्यावेळी कार्यरत असलेले कार्यकारी अधीक्षक घरबुडवे तसेच अधीक्षक इंदुलकर यांना निलंबित करण्यात येत असल्याची घोषणा गृहराज्यमंत्री डॉ. रणजित पाटील यांनी मंगळवारी विधान परिषदेत केली.

विरोधी पक्षनेते धनंजय मुंडे यांनी याबाबतची लक्षवेधी सूचना मांडली होती. यावेळी बोलताना त्यांनी या प्रकरणी पोलीस उपमहानिरीक्षक (कारागृहे) स्वाती साठे यांनाही निलंबित करून सहआरोपी करण्याची मागणी केली. सुनील तटकरे, संजय दत्त, जयवंत जाधव, विद्या चव्हाण, भाई जगताप आदी सदस्यांनी मुंडे यांच्या मागणीचे समर्थन केले. नीलम गोऱ्हे यांनी या प्रकरणाची न्यायालयीन चौकशी करण्याची मागणी केली.

विरोधकांच्या उपप्रश्नांना उत्तर देताना गृहराज्यमंत्र्यांनी स्वाती साठे यांची सचिव दर्जाच्या वरिष्ठ अधिकाऱ्याकडून चौकशी केली जाईल, असे जाहीर केले. मात्र, साठे यांना खुनाच्या आरोपाखाली अटक असलेल्या आरोपींबरोबर सहआरोपी करण्यास नकार दिला.