मंत्रालयाच्या ६ व्या मजल्यावरून उडी घेत तरुणाचा आत्महत्येचा प्रयत्न !

मुंबई- मंत्रालयात आत्महत्या करण्याच्या प्रयत्न नेहमीच होत आहे. विषप्राषन करून शेतकरी धर्मा पाटील यांनी आत्महत्या केल्याचे प्रकरण मागील वर्षी घडले होते. त्यामुळे सरकारला मोठ्या प्रमाणात टीकेला सामोरे जावे लागले होते. दरम्यान आता पुन्हा एकदा मंत्रालयात एका तरुणाने आत्महत्या करण्याचा प्रयत्न केला आहे. मंत्रालयाच्या सहाव्या मजल्यावरुन या तरुणाने उडी मारली, मात्र सुदैवाने खाली लावलेल्या संरक्षक जाळ्यांमध्ये हा तरुण अडकला आणि त्याचे प्राण वाचले.

आज दुपारच्या सुमारास ही घटना घडली आहे. लक्ष्मण चव्हाण असे उडी मारणाऱ्या तरुणाचे नाव असल्याची माहिती असून तो प्रजासत्ताक भारत पक्षाचा कार्यकर्ता असल्याचे सांगितले जात आहे. या घटनेमुळे मंत्रालयात काही वेळासाठी गोंधळाचे वातावरण झाले होते. पण थोड्याच वेळात अग्निशमन दलाचे जवान आणि पोलिसांच्या मदतीने या तरुणाला जाळीवरुन सुरक्षित खाली उतरवण्यात आले आहे. सध्या त्याच्याकडे चौकशी केली जात आहे.