मतदार याद्यांकडे सोसायट्यांचे दुर्लक्ष
जिल्हाधिकार्‍यांच्या आदेशांना केराची टोपली : मतदार याद्यांचा विशेष संक्षिप्त पुनर्परीक्षण कार्यक्रम
पुणे : मतदार याद्यांचा विशेष संक्षिप्त पुनर्परीक्षण कार्यक्रम शहरासह जिल्ह्यात राबविण्यात येत आहे. त्या अंतर्गत गृहनिर्माण सोसायट्यांमधील रहिवाशांची मतदारांची नोंदणी, दुरुस्ती, दुबार व मयत नावे वगळणे अशा कामांसाठी सहकारी गृहनिर्माण संस्थांची मदत घेण्यात येणार आहे. याबाबत जिल्हाधिकार्‍यांनी आदेश देऊनही अद्याप गृहनिर्माण संस्थांकडून कोणत्याही प्रकारची कार्यवाही करण्यात आलेली नाही. त्यामुळे सहकारी सोसायट्यांनी मतदार यादी अद्ययावतीकरणाकडे दुर्लक्ष केल्याचे दिसून येते. तसेच जिल्हाधिकार्‍यांच्या आदेशालाही हरताळ फासला गेला आहे.
गृहनिर्माण संस्थांचे अध्यक्ष, सचिवांची स्वयंसेवक म्हणून निवड
निवडणूक आयोगाच्या आदेशानुसार जिल्ह्यात मतदार यादी पुनर्परीक्षण कार्यक्रम सुरू करण्यात आला आहे. या कार्यक्रमांतर्गत मतदार नोंदणी, नावातील दुरुस्ती आणि नावे वगळणे ही कामे करण्यात येत आहेत. या कामासाठी पुणे आणि पिंपरी-चिंचवडमधील सहकारी गृहनिर्माण संस्थांचे अध्यक्ष, सचिव यांना मतदान केंद्रस्तरीय स्वयंसेवक म्हणून घोषित करण्यात आले आहे. या घोषणेच्या पार्श्‍वभूमीवर पुणे, पिंपरी-चिंचवडमधील गृहनिर्माण संस्थांचे अध्यक्ष आणि सचिव यांची 19 ऑक्टोबरला जिल्हाधिकारी नवल किशोर राम यांनी बैठक घेतली. गृहनिर्माण संस्थांकडून आलेल्या यादीनुसार मतदार यादी अद्ययावत झाली किंवा कसे? याबाबत दर आठवड्याला आढावा घेण्यात येईल, असे या बैठकीत राम यांनी स्पष्ट केले होते.
जिल्ह्यात महत्त्वाच्या बैठका
दरम्यान, अशाप्रकारचा अभिनव उपक्रम प्रथमच राबवला जात आहे. आगामी लोकसभा आणि विधानसभा निवडणुकांच्या पाश्‍वभूमीवर मतदार यादी अद्ययावत करण्यासाठी पुणे आणि पिंपरी-चिंचवड भागातील महत्त्वाच्या भागात बैठका घेण्यात येणार आहेत. शहरात 16,360 गृहनिर्माण संस्था असून सहा उपनिबंधक कार्यालये आहेत. या कार्यालयांच्या क्षेत्रातील मतदार याद्यांच्या अद्ययावतीकरणासाठी प्रयत्न केले जात आहेत. परंतु, गृहनिर्माण संस्थांकडून मतदार यादी अद्ययावत करण्याबाबत अद्याप कोणत्याही प्रकारचा प्रतिसाद मिळालेला नाही, अशी माहिती उपजिल्हा निवडणूक अधिकारी मोनिका सिंह यांनी दिली.
गृहनिर्माण संस्थांनी करावयची कामे
निवडणूक आयोगाच्या निर्देशानुसार मतदार याद्यांचा विशेष संक्षिप्त पुनर्निरीक्षण कार्यक्रम शहरासह जिल्ह्यात राबवण्यात येत आहे. या अंतर्गत मतदारांची नोंदणी, दुरुस्ती, दुबार व हयात नसलेल्यांची नावे वगळणे याबाबत कार्यवाही सुरू आहे. गृहनिर्माण संस्थांची निवडणूकविषयक कामकाजात मदत होण्यासाठी आणि सोसायट्यांमधील मतदार यादी अद्ययावत करण्यासाठी संबंधित संस्थांचे अध्यक्ष, सचिवांना मतदान केंद्रस्तरीय स्वयंसेवक म्हणून घोषित करण्यात आले आहे. गृहनिर्माण संस्थेतील नवीन मतदारांची नावनोंदणी करणे, मयत, दुबार व स्थलांतरित मतदारांची नावे कमी करणे आणि मतदार यादीतील सध्याची नावे, पत्ता, छायाचित्रांमधील दुरुस्ती अशी कामे करणे अपेक्षित आहे.