मधू कोडांना तीन वर्षांचा तुरुंगवास
नवी दिल्ली : कोळसा घोटाळ्यात दोषी ठरलेले झारखंडचे माजी मुख्यमंत्री मधू कोडा यांना सीबीआयच्या विशेष न्यायालयाने शनिवारी तीन वर्षांच्या तुरुंगवासाची शिक्षा आणि 25 लाख रुपये दंड सुनावला. तसेच माजी कोळसा सचिव गुप्ता यांनाही करावासाची शिक्षा ठोठावली आहे.
नियमबाह्य पद्धतीने खाणवाटप
झारखंडमधील कोळसा खाणवाटपात कोलकात्यातील विनी आयर्न आणि स्टील कंपनीला नियमबाह्य पद्धतीने खाण वाटप केल्याचे कोडा आणि इतर सनदी अधिकार्‍यांवरील आरोप सिद्ध झाले आहेत. या कंपनीला झारखंडमधील राजहरा इथल्या कोळसा खाणी देण्यात आल्या होत्या. या प्रकरणी विशेष सीबीआय न्यायालयाने 13 डिसेंबर रोजी झारखंडचे माजी मुख्यमंत्री मधू कोडा, माजी कोळसा सचिव एच. सी. गुप्ता, झारखंडचे माजी मुख्य सचिव अशोक कुमार बसू आणि अन्य एकाला गुन्हेगारी कट रचल्याप्रकरणी कलम 120 बी अंतर्गत दोषी घोषित केले होते. त्यानंतर शनिवारी शिक्षा सुनावण्यात आली.
शिक्षा कमी करण्याची विनंती
मधु कोडा यांनी न्यायालयाकडे आपली शिक्षा कमी करण्यात यावी अशी विनंती केली होती. आपण आरोग्यसंबंधी समस्यांनी ग्रस्त आहोत. तसेच आपल्याला दोन लहान मुली असल्याने आपल्या विनंतीचा गांभीर्याने विचार करण्यात यावा, अशी मागणी कोडा यांनी न्यायालयाकडे केली होती. मात्र, न्यायालयाने त्यांना तीन वर्षांच्या कारावासाची शिक्षा सुनावली आहे.