मनसेची दिशा उद्या ठरणार

मुंबई: महाराष्ट्र नवनिर्माण सेनेचे राज्यस्तरीय अधिवेशन उद्या मुंबईत होणार आहे. या अधिवेशनात मनसे प्रमुख राज ठाकरे हे आपला जुना झेंडा रद्द करून नवीन आणणार असल्याचे सांगण्यात येत आहे. नवीन झेंडा हा फक्त भगव्या रंगाचा राहणार असल्याचे सांगण्यात येत आहे. मनसेचे अधिवेशन हे पक्षाला नवीन कलाटणी देणार असल्याचे सांगण्यात येत आहे. शिवसेनेनंतर मनसे हिंदुत्वाची कास धरणार असल्याचे राजकीय वर्तुळात चर्चा रंगत आहे.

मनसे आपल्या नव्या प्रस्तावित झेंड्यावर शिवमुद्रा असेल हे वृत्त काही दिवसांपूर्वीच प्रसिद्ध झालं. त्यानंतर त्यांवर अनेकांनी आक्षेपही नोंदवले. मात्र, मनसेने निवडणूक आयोगाकडे दोन प्रकारचे झेंडे पाठवल्याची माहिती सूत्रांनी दिली. त्यांपैकी एक शिवमुद्रा असलेला झेंडा आहे. तर, दुसऱ्या झेंड्यावर मनसेचे निवडणूक चिन्ह असलेले इंजिन दाखवण्यात आले आहे.
महाराष्ट्र नवनिर्माण सेनेने आपल्या फेसबुक आणि ट्टिवरवरील प्रोफाइल फोटोमधील झेंडा हटवला असून त्या जागी फक्त ब्लॅक अॅण्ड व्हाइट इंजिनाचे चित्र ठेवण्यात आले आहे. या प्रोफाइल फोटोची जागा नवा भगवा झेंडा घेणार असून निवडणूक आयोग दोन पैकी कोणत्या झेंड्याला मान्यता देतो, याची वाट मनसे पाहत आहे.

शिवसेनेला जय महाराष्ट्र करत राज ठाकरे यांनी महाराष्ट्र नवनिर्माण सेनेची स्थापना केली. त्यावेळी त्यांनी मराठी माणसांच्या भल्यासाठी आणि महाराष्ट्राच्या नवनिर्माणासाठी पक्षाची स्थापना केल्याची घोषणा केली होती. मराठी माणसासाठी लढण्याचे जाहीर करत असताना त्यांनी सर्वसमावेशक भूमिका घेतली होती. त्यानुसारच त्यांनी आपल्या पक्षाच्या झेंड्यामध्ये भगव्याबरोबर निळा आणि हिरवा रंगही घेतला होता. राज्यस्तरीय अधिवेशनासाठी मुंबईत जय्यत तयारी सुरु असून, राज्यभरातून यासाठी मनसे सैनिक येणार असल्याचे सांगण्यात येत आहे.