मराठा सेवा संघ, संभाजी ब्रिगेडचे 9 वे राज्यस्तरीय अधिवेशन अलिबागला

‘आर्थिक सक्षमीकरण, आणि कृषी व उद्योग व्यवसायातील संधी’ विषयावर होणार मार्गदर्शन

पिंपरी चिंचवड : मराठा सेवा संघ संभाजी ब्रिगेड संघटनेचे 9 वे राज्यस्तरीय अधिवेशन शनिवारी दि. 27 आणि रविवारी 28 ऑक्टोबर दरम्यान पीएनपी हॉल, अलिबाग, जि. रायगड येथे आयोजित करण्यात आले आहे. या अधिवेशनास पुणे जिल्हा व पिंपरी चिंचवड शहरातून हजारो कार्यकर्ते जाणार असल्याची माहिती संभाजी ब्रिगेडचे राज्य समन्वयक शांमाराम कुंजीर, राज्य संघटक रमेश हांडे, पुणे जिल्हाध्यक्ष विशाल तुळवे, पिंपरी चिंचवड महानगराध्यक्ष सुधीर दामोदर पुंडे यांनी पत्रकार परिषदेत दिली.

हार्दिक पटेल यांच्याहस्ते उद्घाटन…

अधिवेशनाचे उद्घाटन पाटीदार आरक्षण आंदोलनाचे नेते हार्दिक पटेल यांच्या हस्ते होणार आहे. या अधिवेशनाचे स्वागताध्यक्ष पद शेतकरी कामगार पक्षाचे सरचिटणीस जयंत पाटील भूषविणार आहेत. सुरुवातीला शिवशाहिर राजेंद्र कांबळे यांचा पोवाडा होईल. त्यानंतर, दुपारच्या सत्रात ‘आर्थिक सक्षमीकरण, आणि कृषी व उद्योग व्यवसायातील संधी’ या विषयावर उद्योजक राजेंद्र धुरगुडे-पाटील, उद्योजक मासिकचे संपादक धर्मेंद्र पवार, मिटकॉनचे मुख्यव्यवस्थापक गणेश खामगळ, नाशिकच्या सह्याद्री फाऊंडेशनचे विलास शिंदे, उद्योजक मनोज कदम मार्गदर्शन करणार आहेत.

विविध विषयांवर होणार चर्चा…

तसेच, ‘दहशतवादाचे बदलते स्वरूप’; ‘भिमा कोरेगाव दंगल प्रकरण’; ‘सनातन संस्था समाजसुधारकांच्या झालेल्या हत्या’ आदी विषयांवर आमदार जितेंद्र आव्हाड, माजी आयपीएस अधिकारी एस. एम. मुश्रीफ, संभाजी ब्रिगेडचे प्रदेश संघटक अमोल मिटकरी व प्रवक्ता यशवंत गोसावी मार्गदर्शन करतील.
‘मोर्च पे चर्चा’; ‘मराठा समाजाने काढलेले मोर्चे’; ‘महाराष्ट्रात निघालेले बहुजन क्रांती मोर्चे’; ‘मराठा, धनगर, मुस्लीम आरक्षण यापुढील समस्या’ या विषयांवर झी चोविस तासचे निवेदक अजित चव्हाण संवाद साधणार आहेत.

मराठा भूषण पुरस्काराचे वितरण…

रविवारी ‘समाजकारण व राजकारणातील वर्तमान स्थिती’; ‘गुन्हेगारी प्रवृत्तीचे राजकारण’; ‘आर्थिकतेतून होणारे राजकारण लोकशाहिस मारक’; राजकारणाकडे युवकांचा पाहण्याचा दृष्टीकोन, ‘प्रचार, प्रसार माध्यमे व सोशल मिडीयाचे अनन्य साधारण महत्व’, आदी विषयांवर मान्यवर मार्गदर्शन करतील. यावेळी मराठा सेवा संघाचे महासचिव विजय कुमार ठुबे, मराठा सेवा संघाचे प्रदेश अध्यक्ष विजय घोगरे, उद्योजक जेएम म्हात्रे, इतिहास संशोधक श्रीमंत कोकाटे, ज्येष्ठ व्याख्याते प्रदिप साळुंखे, मराठा आंदोलक महिला नेत्या जयश्री शेळके, राष्ट्रमाता जिजाऊ तैलचित्राचे निर्माते बंडूभाऊ मोरे, अ‍ॅड. समीर घाटवे, संजय उरमोडे यांना मराठा भूषण पुरस्कार देऊन गौरविण्यात येणार आहे.