मराठी भाषेसाठी तांडव सुरु असताना शिवसेनेची चुप्पी!

मुंबई (निलेश झालटे)- अधिवेशनाच्या पहिल्या दिवसापासून मराठी भाषेचा अवमान झाल्याच्या आरोप करत विरोधकांनी रान पेटवले असताना मराठीच्या नावाने गळे काढणाऱ्या शिवसेनाकडून मात्र चुप्पी साधली जात आहे. राज्यपालांचे अभिभाषण मराठीत अनुवादित न झाल्यामुळे विरोधी पक्ष एकीकडे आक्रमक झाला असताना दुसरीकडे मराठीच्या नावावर गळे काढणाऱ्या शिवसेनेची भूमिका मात्र काहीअंशी शांतच असलेली दिसून आली होती. मराठी भाषण अनुवादित होत नसल्याचा विरोध करण्यासाठी शिवसेनेकडून ते तीन ते चारच सदस्यांनी आक्षेप घेतला होता. मंगळवारी देखील मराठी भाषेच्या संदर्भात चर्चा सुरु असताना सभागृहात देखील एकही मंत्री अथवा सदस्य मराठीच्या मुद्द्यावर बोलताना दिसून आला नाही.  शिवसेना प्रत्येक वेळेस मराठीचा पुळका मात्र काही आमदार वगळता ते गप्प का? असा सवाल अजित पवार यांच्यासह अनेक विरोधकांनी केला आहे.  आयुष्यभर मराठी भाषेसाठी आवाज उचलला तो शिवसेना पक्षातील नेते शांत कसे काय बसले ?असा सवाल विरोधकांनी केला.

कार्यक्रमात शिवसेनेला डावलले:- रावते 
विधिमंडळ परिसरात राज्य सरकारच्या वतीने आयोजित करण्यात आलेल्या मराठी भाषा गौरव दिनाच्या कार्यक्रमात शिवसेनेला डावलण्यात आले आहे. शिवसेनेला फक्त कार्यक्रमातून डावलले जाऊ शकते पण शिवसेनेला मराठीपासून कोणीही लांब ठेवू शकत नाही, असे शिवसेना नेते आणि परिवहन मंत्री दिवाकर रावते यांनी सांगितले. मराठी भाषा गौरव दिनानिमित्त आयोजित कार्यक्रमात शिवसेनेला डावलण्यात आले. यावेळी मंत्री एकनाथ शिंदे यांना मान देणे गरजेचे होते. मात्र, भाजपकडून तसे करण्यात आले नसल्याची खंत दिवाकर रावते यांनी व्यक्त केली. शिवसेनेच्या या नाराजीवर विरोधी पक्षनेते राधाकृष्ण विखे पाटील यांनी खिल्ली उडवली आहे. शिवसेनेला आपला अपमान झाला आहे, असे वाटत असेल तर सेनेने सत्तेतून बाहेर पडावे. शिवसेना सभागृहात वेगळे वागते आणि सभागृहाच्या बाहेर वेगळे वागते. त्यामुळे शिवसेनेची भूमिका ही दुटप्पी असल्याचे विखे पाटील म्हणाले.

मराठी भाषा गौरव दिनीच सांस्कृतीक कार्यमंत्री विनोद तावडे यांनी प्रवेशद्वारा ऐवजी गेट असा उल्लेख करत नवा वाद निर्माण केला. त्यांच्या या इंग्रजी उच्चारावर  रावते यांनी आक्षेप घेतला. आजच्या दिवशी तरी गेटला प्रवेशद्वार म्हणा अशा शब्दात त्यांनी तावडेंना सुनावले. मराठी भाषा गौरवदिनानिमित्त विधानमंडळ परिसरात विशेष कार्यक्रम आयोजित करण्यात आला होता. कार्यक्रमाच्या सुरुवातीला सांस्कृतिक कार्यमंत्री विनोद तावडे उपस्थितांना सुचना देत होते. “मराठी अस्मिता गीताची प्रत गेटवर प्रत्येकांना देण्यात आली आहे, त्या प्रतिवरील मराठी अस्मिता गीत वाचावे” असे ते सांगत होते.  तावडे यांनी गेट असा उल्लेख करताच खाली उभे असलेले रावते यांनी तावडे यांना खडसावले. मराठी भाषा गौरव दिनी तरी गेट ऐवजी प्रवेशद्वार म्हणा असे त्यांनी सांगितले. मराठी भाषा दिना निमित्त मराठी अभिमान गीत गायले जात असताना तरी मराठीचा चांगला वापर करावा, अशी अपेक्षा यावेळी व्यक्त करण्यात आली.