मराठी साहित्यिक, लेखकांसाठी गुगलचा अभिनव उपक्रम

पुणे । मराठी साहित्याची वाढती मागणी लक्षात घेऊन गुगलने मराठी साहित्यिक आणि लेखकांसाठी इंटरनेटच्या माध्यमातून एका अभिनव उपक्रमाची आखणी केली आहे. इंटरनेटमार्फत आपले साहित्य आणि पुस्तके पोहोचवू पाहणार्‍या लेखक आणि प्रकाशकांना गुगलतर्फे मार्गदर्शन करण्यात येणार आहे. यासाठी गुगल सर्च संमेलन या उपक्रमाची सुरुवात करण्यात येणार असून, त्याचा पहिला टप्पा म्हणून येत्या 22 जून रोजी गुगलतर्फे पुण्यात कार्यशाळेचे आयोजन करण्यात आले आहे. मराठीसाठी आवश्यक गुगलच्या विविध फीचर्ससंदर्भात या कार्यशाळेत माहिती दिली जाईल.

गुगलतर्फे सहकार्य करण्यात येणार
कार्यशाळेत सहभागी होणार्‍या सदस्यांची निवड गुगल टीमकडून केली जाणार आहे. एका लिंकवर कार्यशाळेचा नोंदणी अर्ज उपलब्ध करण्यात आला आहे. निवड झालेल्या सदस्यांना ई-मेलद्वारे कार्यशाळेची माहिती कळवली जाईल. गुगल सर्च संमेलन या उपक्रमांतर्गत हिंदीसह मराठी, तमीळ, तेलुगू आणि बंगाली या चार प्रादेशिक भाषांमधील लेखक, प्रकाशक, ब्लॉग लेखक, वेबसाइटची निर्मिती करणारे डेव्हलपर; तसेच मराठीशी संबंधित व्यावसायिक यांच्याशी गुगल संवाद साधणार आहे.