महापालिका आयुक्तांच्या मोटारीला ट्रीपल सीटचा दंड

पिंपरी चिंचवड : पुणे वाहतूक पोलिसांनी चक्क चारचाकी गाडीला ट्रीपल सीटच्या पावतीचा दंड फाडला आहे. यामुळे वाहतुक पोलीसांचा अजब कारभार समोर आला आहे. हा सर्व प्रकार निगडी मधील सूरज स्वीट येथे घडला असून ही चारचाकी गाडी पिंपरी चिंचवड महापालिका आयुक्त श्रावण हर्डीकर यांची आहे. त्यामुळे हा चर्चेचा विषय ठरत आहे. पिंपरी चिंचवड महापालिका आयुक्त श्रावण हर्डीकर यांच्या एम. एच-14 सी.एल 1599 चारचाकी गाडीला वाहतूक पोलिसांनी ट्रीपल सीटचा दंड ठोठावला आहे. यासाठी त्यांना 200 रुपडे दंड आकारण्यात आला. परंतु चारचाकी गाडीला ट्रीपल सीट दंड कसा? याबाबत सर्वत्र चर्चा सुरु आहे. तसेच, ही एक अक्षम्य चूक असून वाहतूक पोलिसांनी ती मान्य केली.

महापालिका आयुक्त यांच्या गाडीचा नंबर एम.एच-14 सी.एल 1599 हा असून सारखाच नंबर एका दुचाकीचा आहे. या दुचाकीवरून काहीजण ट्रीपल सीट वाहतुक करीत होते. वाहतूक पोलिसांना सीरियल क्रमांकात डी.एल च्या ऐंवजी चुकून सी.एल लिहिले होते. त्यामुळेच आयुक्तांच्या गाडीला पावती फाडली गेली. हा सर्व प्रकार नजरचुकीने झाल्याची कबुली निगडी वाहतूक पोलीस निरीक्षक रवींद्र निंबाळकर यांनी दिली असून ती चूक दुरुस्त करून घेतली जाईल असे सांगितले आहे.