महापालिका कर्मचार्‍यांची  दिवाळी यंदाही होणार गोड!

पिंपरी-चिंचवड : महापालिकेतील अधिकारी, कर्मचार्‍यांची दिवाळी गोड होणार आहे. दिवाळीसाठी 8.33 टक्के बोनस व 15 हजार रुपये सानुग्रह अनुदान दिले जाणार आहे. कर्मचार्‍यांबरोबरच शिक्षक व बालवाडी शिक्षकांना देखील हा लाभ दिला जाणार आहे. ही रक्कम दिवाळीपूर्वी सर्व कर्मचार्‍यांना मिळेल, याची तजवीज करण्याचे आदेश महापालिका आयुक्त श्रावण हर्डीकर यांनी लेखा विभागाला दिले आहेत.

औद्योगिक कायद्यानुसार महासंघ व महापालिकेत  8.33 टक्के बोनस व 15 हजार रुपये सानुग्रह अनुदान देण्याबाबत 2015-16 मध्ये पाच वर्षांचा करार झाला आहे. हा करार कामगार कायद्यानुसार झाला आहे. त्यानुसार महापालिकेतील अधिकारी, कर्मचारी यांना 8.33 प्रथा बोनस व 15 हजार रुपये सानुग्रह अनुदान देण्यात येतो. कर्मचार्‍यांना दिवाळीपुर्वी बोनस व सानुग्रह अनुदानाची रक्कम देण्याची मागणी महापालिका कर्मचारी महासंघाने केली होती. त्यासाठी मंगळवारी आयुक्तांसोबत कर्मचारी महासंघाची बैठक झाली. या बैठकीत बोनस देण्याचे आदेश आयुक्तांनी दिली. मुख्यलेखापाल जितेंद्र कोळंबे, कामगार कल्याण विभागाचे सहाय्यक आयुक्त  चंद्रकांत इंदलकर, कर्मचारी महासंघाचे अध्यक्ष बबन झिंजुर्डे, महासचिव चारुशिला जोशी, कार्याध्यक्ष मनोज माछरे, महाद्रंग वाघेरे, नितीन समगीर, दिगंबर चिंचवडे, विशाल भुजबळ, सुनिल विटकर बैठकीला उपस्थित होते.

आस्थापनेवर सुमारे साडेसात हजार अधिकारी व कर्मचारी कार्यरत आहेत. तर बालवाडी, प्राथमिक व माध्यमिक शिक्षकांची संख्या सुमारे दीड हजार आहे. पालिकेतील सर्व वर्ग 1 ते 4 मधील अधिकारी व कर्मचा-यांना तसेच रजा राखीव वैद्यकीय अधिकारी व रजा राखीव परिचारिकांना 8.33 टक्के प्रथा बोनस व 15 हजार रुपये सानुग्रह अनुदान देण्यात येणार आहे. याचा लाभ महापालिकेत मानधन तत्वावर काम करणा-यां कर्मचा-यांना देखील दिला जाणार आहे. यामध्ये राखीव वैद्यकीय अधिकारी, राखीव नर्सेस, शिक्षण विभागातील अधिकारी, कर्मचारी, समूह संघटक यांचा समावेश आहे.