महापालिका मुख्यालयातच दूषित पाणीपुरवठा!

चौथ्या मजल्यावर असलेल्या फिल्टरमध्ये हिरवेगार पाणी

पिंपरी-चिंचवड : महापालिका मुख्यालयातच दूषित पाणीपुरवठा होत असल्याची गंभीर बाब सोमवारी समोर आली आहे. महापालिका मुख्यालयातच दूषित पाणीपुरवठा होत असेल तर शहराची काय परिस्थिती असेल? असा प्रश्न उपस्थित होत आहे. महापौर नितीन काळजे यांच्या प्रभागातदेखील दूषित पाणीपुरवठा होत असल्याची तक्रार स्वत: महापौरांनी केली होती. त्यामुळे शुद्ध पाणीपुरवठ्याचा प्रश्‍न पुन्हा एकदा ऐरणीवर आला आहे.

पाणीपुरवठ्याविषयी तक्रारीच तक्रारी
पवना धरणात शंभर टक्के पाणी असूनही नागरिकांच्या घरात पाणी नसल्याची ओरड नेहमीच येत आहे. शहराच्या विविध भागात कमी दाबाने पाणीपुरवठा होत असल्याच्या तक्रारी आहेत. महापौर नितीन काळजे यांच्या चर्‍होली-मोशी प्रभागतही दूषित पाणीपुरवठा होत होता. त्यावरून महापौरांनी पाणीपुरवठा विभागाच्या अधिकार्‍यांना फैलावर घेतले होते.

नगरसेवकांच्या आले लक्षात
महापालिका मुख्यालयात चौथ्या मजल्यावर असलेल्या ’फिल्टर’मधून हिरवेगार पाणी आले. फिल्टरमध्ये शेवाळे साचले आहे. नगरसेवक केशव घोळवे, तुषार हिंगे यांनी या फिल्टरमधून पिण्यासाठी पाणी आणले असता हिरवेगार पाणी आले. याबाबत नगरसेवक घोळवे, हिंगे व माजी नगरसेवक मारुती भापकर यांनी त्वरित आयुक्त श्रावण हर्डीकर यांच्याकडे तक्रार केली. आयुक्तांनी पाण्याच्या टाकीची पाहणी केली. पाणीपुरवठा विभागाचे अधिकारी, साफसफाई कर्मचार्‍यांकडे विचारणा करून स्वच्छता ठेवण्याबाबत कडक सूचना आयुक्तांनी केल्या आहेत. तसेच फिल्टरला जाळ्या बसविण्याच्याही सूचना त्यांनी केल्या आहेत.