महापालिका शाळेत पहिल्याच दिवशी विद्यार्थ्यांच्या हातात पुस्तके

प्रभारी प्रशासन अधिकारी पराग मुंढे यांची माहिती

पिंपरी-चिंचवड : महापालिका शिक्षण विभागाने बालभारतीकडून मागविलेली (पहिलीची वगळता) सर्व शालेय पाठ्यपुस्तके दाखल झाली. समग्र शिक्षा अभियानांतर्गत 20 केंद्रावरून ती वितरित करण्यात येतील. त्यामुळे शाळेच्या पहिल्या दिवशीच विद्यार्थ्यांकडे पाठ्यपुस्तके असतील, असे शिक्षण विभागाचे प्रभारी प्रशासन अधिकारी पराग मुंढे यांनी सांगितले.

80 टक्के पुस्तके दाखल
समग्र शिक्षा अभियानांतर्गत दरवर्षी महापालिका, अनुदानित, विनाअनुदानित व खासगी शाळांमध्ये इयत्ता पहिली ते आठवीच्या विद्यार्थ्यांना मोफत पाठ्यपुस्तके दिली जातात. यासाठी 2018-19 या शैक्षणिक वर्षातील महापालिका शिक्षण विभागाने बालभारतीकडे सहा लाख दोन हजार 596 पुस्तकांची मागणी केली होती. त्यानुसार बालभारतीने पुस्तकांची छपाई केली. शिक्षण विभागाच्या एकूण मागणीपैकी 86 टक्के पुस्तके महापालिकेच्या पिंपरी आणि आकुर्डीच्या शहर साधन केंद्रावर दाखल झाली आहेत.

पहिलीची पुस्तके 15 जूनपर्यंत
“यावर्षी पहिली, आठवी आणि दहावीचा अभ्यासक्रम बदललेला आहे. त्यानुसार आठवीची नवीन पुस्तके छापली असून, सर्व माध्यमांची आठवीची पुस्तके दाखल झाली आहेत. दहावीचीदेखील पुस्तके उपलब्ध आहेत. मात्र, बदललेल्या अभ्यासाक्रमापैकी इयत्ता पहिलीची पुस्तके अद्याप केंद्रावर दाखल झालेली नाहीत. पहिलीची 37 हजार 640 पुस्तके 15 जूनपर्यंत मिळण्याची शक्यता प्रशासनाने व्यक्त केली आहे.