महापालिका सभागृह नेता, विरोधी पक्षनेतेपदासाठी नगरसेवकांची मोर्चेबांधणी

नवी मुंबई । महापौर निवडणुकीनंतर पालिकेत आता विरोधी पक्ष व सभागृह नेता बदलण्याचे वारे वाहू लागले आहेत. राष्ट्रवादीचे सभागृह नेते जयवंत सुतार यांच्या गळ्यात महापौरपदाची माळ पडल्याने त्यांच्या जागेवर आपली वर्णी लागावी यासाठी अनेकजण प्रयत्नशील आहेत, तर त्याचवेळी विरोधी पक्षनेतादेखील बदलण्याची शक्यता वर्तविण्यात येत आहे. सभागृह नेतेपदासाठी पक्षातील ज्येष्ठ नगरसेवक रवींद्र इथापे, अशोक गावडे, नेत्रा शिर्के, डॉ. नाथ यांच्यापैकी एका नगरसेवकाची वर्णी लागण्याची शक्यता आहे, तर विरोधी पक्षनेता पदासाठी शिवसेनेत मोठी रस्सीखेच सुरू आहे.

सर्वसाधारण सभेत सभागृह नेता जाहीर होणार
एम. मढवी, द्वारकानाथ भोईर, किशोर पाटकर, नामदेव भगत, सरोज पाटील, शिवराम पाटील, सोमनाथ वास्कर यांच्या नावाची चर्चा सुरू आहे. यात मढवी यांच्या नावाला पक्षश्रेष्ठींची पसंती मिळण्याची शक्यता आहे. या महिन्यात होणार्‍या सर्वसाधारण सभेत सभागृह नेता जाहीर केला जाणार असल्याने त्याच वेळी विरोधी पक्षनेतादेखील बदलण्याची शक्यता आहे. महापौर, उपमहापौरपदाच्या निवडीचे सोपस्कर गेल्या महिन्यात पार पडल्यानंतर पालिकेतील विरोधी पक्षनेता व सभागृह नेता निवडीचे वारे वाहू लागले आहेत. सभागृहातील सर्वात मोठा पक्ष असलेल्या राष्ट्रवादीचा सभागृह नेता महापौर झाल्याने त्यांच्या जागी नवीन सभागृह नेत्याची निवड या महिन्यात केली जाणार आहे. त्यासाठी पक्षातील ज्येष्ठ व एकनिष्ठ नगरसेवकाची निवड केली जाणार आहे.

दोन पदांना महापौरांची मंजुरी आवश्यक
याच वेळी शिवसेनेने विरोधी पक्षनेत्याचे नाव जाहीर करावे, असे प्रयत्न महापौराच्या वतीने सुरू आहेत. ही दोन नावे आल्यानंतर महापौर पुढील कालावधीसाठी सभागृह नेता व विरोधी पक्षनेता या दोन पदांना मंजुरी देतील, अशी अपेक्षा आहे. महाराष्ट्र पालिका अधिनियमात या दोन पदांना नवीन महापौरांची मंजुरी आवश्यक मानली गेली आहे. विरोधी पक्षनेतेपदाचे नाव मातोश्रीवरून जाहीर करण्यात येणार आहे. यात पालकमंत्री एकनाथ शिंदे यांची भूमिका महत्त्वाची आहे. घणसोलीचे नगरसेवक गटनेते द्वारकानाथ भोईर, नेरुळचे नामदेव भगत, वाशीचे किशोर पाटकर, सानपाडयाचे सोमनाथ वास्कर, कोपखैरणे येथील शिवराम पाटील, बेलापूरच्या सरोज पाटील यांच्या नावाचीही चर्चा विरोधी पक्ष नेतेपदासाठी सुरू आहे. यांपैकी एका नावावर शिक्कामोर्तब होऊन सर्वसाधारण सभेत महापौरांच्या वतीने हे नाव जाहीर केले जाणार आहे.