महापालिकेतील सत्ताधार्‍यांविरोधात प्रखरतेने आक्रमक आवाज उठवा !
अजितदादांनी दिले नगरसेवकांना डोस
पालिकेतील चुकीच्या कामाविरोधात आवाज उठविण्याच्या सूचना
पिंपरी-चिंचवड : महापालिकेत होत असलेल्या चुकीच्या कामांना प्रखर विरोध करा. त्याच्या विरोधात आक्रमकपणे आवाज उठवा. महापालिकेत सर्रासपणे जादा दराच्या निविदा स्वीकारल्या जात असून त्याला प्रखर विरोध करा. जनतेपर्यंत चुकीची कामे पोहचवा अशा सूचना देत माजी उपमुख्यमंत्री अजित पवार यांनी महापालिकेतील नगरसेवक, नगरसेविकांचे कान टोचले. सत्ताधार्‍यांच्या विरोधात आक्रमक होण्याचे निर्देश दिले. लोकसभा निवडणूक जवळ आली असून त्यादृष्टीने कामाला लागण्याच्या सूचना देखील त्यांनी पदाधिकार्‍यांना केल्या आहेत. दरम्यान, मावळ लोकसभेचा उमेदवार पवार साहेब ठरविणार असल्याचे सांगत उमेदवाराबाबत सस्पेन्स कायम ठेवला आहे.
बारामती गेस्टवर घेतली आढावा बैठक
पिंपरी-चिंचवड शहरातील पक्ष संघटनेचा आणि नगरसेवक, नगरसेविका यांच्या कामकाजाचा माजी उपमुख्यमंत्री अजित पवार यांनी बुधवारी (दि.9)बारामती गेस्ट हाऊस येथे आढावा घेतला. या बैठकीला शहराध्यक्ष संजोग वाघेरे, माजी आमदार विलास लांडे, अण्णा बनसोडे, विरोधी पक्षनेते दत्ता साने, माजी महापौर मंगला कदम, महिला शहराध्यक्षा वैशाली काळभोर, नगरसेविका सुलक्षणा धर यांच्यासह सर्व नगरसेवक, नगरसेविका बैठकीला उपस्थित होते.
शहरातील पक्ष बांधणी, बूथ कमिटी, नगरसेवकांची कोणती विकासकामे प्रलंबित आहेत. राष्ट्रवादी काँग्रेसच्या नगरसेविकांची कामे होत आहेत का? याचा बैठकीत अजित पवार यांनी आढावा घेतला. शहरातील पाणीपुरवठा सुरळीत आहे का?, मेट्रोचे काम, विविध विकासमाकांचा आढावा घेतला. महापालिकेत होणा-या प्रत्येक चुकीच्या गोष्टीवार आक्रमकपणे आवाज उठवा. जादा दराच्या निविदा स्वीकारल्या जात आहेत. त्याला प्रखर विरोध करा. चुकीची कामे जनतेपर्यंत पोहचवा अशा सूचना पवार यांनी नगरसेवकांना दिल्या. तसेच लोकसभा, विधानसभा निवडणूक जवळ आली असून वेळ कमी आहे. त्यानुसार कामाला लागा. प्रत्येकाने आपली जबाबदारी ओळखून कामाला सुरुवात करावी.
मावळच्या उमेदवाराचे गुपित
मावळ लोकसभेचा उमेदवार योग्य वेळी जाहीर केला जाईल. पवार साहेब उमेदवार ठरविणार आहेत. उमेदवार कोण असेल याचा विचार करत न बसता कामाला सुरुवात करावी. लोकसभा, विधानभा आणि स्थानिक पातळीच्या निवडणुका वेगळ्या असतात. राष्ट्रवादीची सत्ता असताना केलेली विकास कामे जनतेपर्यंत पोहचवा, अशा सूचना त्यांनी दिल्या. परंतु, मावळातून उमेदवार कोण असेल याचा सस्पेन्स पवार यांनी कायम ठेवला.