महामार्गालगत ढाब्यावर पोलिसांची धडक कारवाई

भुसावळ। उच्च न्यायालयाच्या निर्णयानुसार महामार्गालगत दारु विक्रीला बंदी घातल्यानंतरही शहरातील राष्ट्रीय महामार्गावरील हॉटेल पंजाब खालसा सरपंचदा ढाब्यावर दारु विक्री सुरु असल्यामुळे अचानक झालेल्या कारवाईत 1लाख 16 हजार 950 रुपये किंमतीची देशी-विदेशी दारु जप्त करण्यात आली़ गुरुवार 1 रोजी पहाटे 3 वाजेच्या सुमारास सहाय्यक पोलीस अधीक्षक नीलोत्पल यांच्या पथकाने ही कारवाई केली़

पहाटेच्या सुमारास कारवाई
सहाय्यक अधीक्षक नीलोत्पल यांना ढाब्यात दारूचा साठा केला असल्याची गुप्त माहिती मिळाल्याने त्यांनी पथकाला सोबत घेत भल्या पहाटे ही कारवाई केली. या प्रकरणी प्रशांत चव्हाण यांच्या फिर्यादीवरून सुनील पंचमसिंग राजपूत (वय 40) व सारंग महादेव पाटील यांच्याविरुद्ध गुन्हा दाखल करण्यात आला़ दरम्यान राजपूत यास पहाटेच अटक करण्यात आली़. जप्त करण्यात आलेल्या दारूमध्ये 71 हजार 840 रुपये किंमतीच्या मॅकडोल व्हिस्कीच्या 449 बाटल्या, 30 हजार 680 रुपये किंमतीच्या टँगोपंचच्या 490 बाटल्या तसेच 14 हजार 430 रुपये किंमतीच्या डिप्लोमॅट कंपनीच्या 111 बाटल्या अशी एकूण एक लाख 16 हजार 950 रुपये किंमतीची दारू जप्त करण्यात आली़.