महाराष्ट्रातील दोन जवान काश्मिरमध्ये हुतात्मा

श्रीनगर : वृत्तसंस्था। काश्मीरमधील लेह ते श्रीनगर दरम्यानच्या मार्गावर होत असलेल्या हिमवृष्टीमुळे दराज येथे महाराष्ट्रातील जवान महादेव तुपारे यांचा बर्फात गुदमरून मृत्यू झाला.

महादेव तुपारे 16 कुमाँऊ रेजिमेंटमध्ये 2005 मध्ये दाखल झाले होते. ते क्लार्क या पदावर कार्यरत होते. तुपारे मूळचे कोल्हापूर जिल्ह्यातील चंदगड तालुक्यातील महिपाळगडचे आहेत. तुपारे यांच्या मृत्युमुळे चंदगड तालुक्यात शोककळा पसरली आहे. हिमवृष्टीमुळे बर्फाखाली गुदमरून महादेव तुपारे यांचा मृत्यू झाल्याचे लष्कराकडून तुपारे कुटुंबीयांना गुरुवारी कळविण्यात आले. लेह-श्रीनगर भागात प्रचंड हिमवृष्टी होत असल्याने तुपारे यांचे पार्थिव पोचविण्यासाठी निकराचे प्रयत्न सुरू आहेत.

सातार्‍याचा जवान पाकड्यांच्या गोळीबारात मृत्यू
सातारा : जम्मू काश्मीरच्या पुंछ सेक्टरमध्ये पाकिस्तानी सैन्याच्या गोळीबारात सातारा जिल्ह्यातील फत्यापूरचे जवान दीपक जगन्नाथ घाडगे हुतात्मा झाले आहेत. याबाबतची माहिती जिल्हा सैनिक कल्याण कार्यालयामधून देण्यात आली आहे.

दीपक घाडगे जम्मू काश्मीर भागात मराठा इन्फंट्रीमध्ये जवान म्हणून कार्यरत होते. गुरूवारी पुंछ सेक्टरमध्ये एलओसीजवळ पाकिस्तानी सैनिकांनी गोळीबार केला. भारताकडूनही याला चोख प्रत्युत्तर देण्यात आले. मात्र यामध्ये 27 वर्षीय दीपक घाडगे यांना वीरमरण आले. घाडगे यांचे पार्थिव शुक्रवारी संध्याकाळपर्यंत सातार्‍यात पोहचण्याची शक्यता आहे. दिपक घाडगे यांच्यावर फत्यापूर गावात शनिवारी अंत्यसंस्कार होणार आहेत. दरम्यान, सातारा जिल्ह्यातील फत्यापूर गावचे सुपुत्र दीपक जगन्नाश घाडगे यांना वीरमरण आल्यामुळे गावावर शोककळा पसरलीय. दीपक यांच्या पश्चात आई, वडील, पत्नी आणि दोन मुले असा परिवार आहे.