महाराष्ट्रातील दोन बालकांची राष्ट्रीय शौर्य पुरस्कारासाठी निवड !

नवी दिल्ली: 26 जानेवारीला प्रजासत्ताक दिनी प्रदान करण्यात येणाऱ्या राष्ट्रीय शौर्य पुरस्कारांची घोषणा आज मंगळवारी २१ रोजी करण्यात आली. देशभरातून 10 मुली आणि 12 मुले अशा एकूण 22 जणांना पुरस्कार जाहीर झाला आहे. यामध्ये महाराष्ट्रातील दोन बालकांचा समावेश आहे. मुंबईची सहावीत शिकणारी झेन सदावर्ते आणि औरंगाबादचा आकाश खिल्लारे या दोघांना पुरस्कारने सन्मानित करण्यात येणार आहे. झेन सदावर्ते हिने तिच्या इमारतीला लागलेल्या आगीतून 17 जणांची सुखरूप सुटका केली होती. आकाशने नदीत बुडणाऱ्या मायलेकीला वाचविले होते.

गेल्यावर्षी 22 ऑगस्ट 2018 रोजी सकाळी मुंबईतील परळ येथील क्रिस्टल टॉवर या 17 मजली इमारतीला आग लागली होती. त्यावेळी झेन सदावर्ते हिने आगीत अडकलेल्या नागरिकांचे प्राण वाचवले होते. औरंगाबादमध्ये राहणाऱ्या आकाश खिल्लारेने एका पाच वर्षीय मुलीचा आणि तिच्या आईचा जीव वाचवला. आकाश शाळेत जात असताना त्याला बुडणाऱ्या माय लेकी दिसल्या. त्याने स्वतःच्या जिवाची पर्वा न करता या दोघींना वाचवलं. नदीवर कपडे धुण्यासाठी आई आणि मुलगी गेल्या होत्या.