महाराष्ट्र केसरी पुस्तकाचे प्रकाशन
पुणे । गौरवशाली महाराष्ट्र केसरीचा गेल्या 56 वर्षांचा इतिहासावर प्रकाशझोत टाकणार्‍या क्रीडालेखक संजय दुधाणे लिखित ‘महाराष्ट्र केसरी यशोगाथा’ या पुस्तकाचे प्रकाशन करण्यात आले. भूगाव येथील मामासाहेब मोहोळ कुस्तीनगरीत महाराष्ट्र कुस्तीगीर परिषदेचे अध्यक्ष खा. शरद पवार यांच्या हस्ते महाराष्ट्र केसरी यशोगाथा पुस्तकाचे प्रकाशन करण्यात आले. यावेळी गिरीश बापट, राधाकृष्ण विखे पाटील, विश्‍वास नांगरे पाटील, बाळासाहेब लांडगे, नामदेव शिरगांवकर, विजय चौधरी, लेखक संजय दुधाणे आदी उपस्थित होते.
शिरगांवकर म्हणाले, महाराष्ट्र केसरीच्या गेल्या 56 वर्षांच्या इतिहासाला हिंदकेसरी यशोगाथा या पुस्तकामुळे उजाळा मिळाला आहे. दुधाणे यांच्या या पुस्तकामुळे नव्या मल्लांना प्रेरक इतिहास वाचण्यास मिळणार आहे. लांडगे म्हणाले, कुस्तीवर आणि यशस्वी मल्लांवर पुस्तके प्रकाशित झाली पाहिजे, हे काम दुधाणे करीत आहेत. आजपर्यंतचा महाराष्ट्र केसरी विजेत्याचा सचित्र इतिहास महाराष्ट्र केसरी यशोगाथा पुस्तकाद्वारे प्रथमच प्रकाशित होत आहे. 80 पानी पुस्तकात महाराष्ट्र केसरी स्पर्धेचा श्रीगणेशा कसा झाला, कुस्ती अधिवेशने कधी झाली, कुस्तीगीर मानधन योजना विषयांवर संग्राह्य माहिती आहे. आता 51 वा महाराष्ट्र केसरी अभिजीत कटकेसह दुसरी आवृत्ती नववर्षात प्रकाशित होईल.