महिन्याला 84 रुपये द्या आणि वर्षाला 24 हजार रुपये मिळवा

नवी दिल्ली । अटल पेन्शन योजनेद्वारे आता तुम्ही महिन्याला 84 रुपये गुंतवा आणि वर्षाला 24 हजार रुपये मिळवा, असा नवा प्रस्ताव सरकारने पुढे आणला आहे. नॅशनल सिक्युरिटीज डिपॉझिटरी लिमिटेडच्या एका अहवालानुसार, जर तुमचे वय 18 वर्षे आहे आणि तुम्ही महिन्याला केवळ 84 रुपयांची गुंतवणूक करत असाल तर वयाच्या 60 वर्षांनंतर तुम्हाला दरमहिन्याला 2 हजार रुपये पेन्शन मिळेल. म्हणजेच 1008 रुपयांमध्ये तुम्हाला वर्षाला 24 हजार रुपये पेन्शन मिळेल, आणि जर पेन्शनची सीमा वाढली, तर परतावाही वाढेल.

पेन्शनची मर्यादा करणार 5 हजारांहून 10 हजार
मोदी सरकारने 2015मध्ये अटल पेन्शन योजनेची सुरुवात केली होती. प्रामुख्याने असंघटित क्षेत्रांमध्ये काम करणार्‍यांचा विचार करून ही योजना सुरू करण्यात आली होती. 18 ते 40 वर्षे वयोगटातील व्यक्ती या योजनेमध्ये गुंतवणूक करू शकतात आणि वयाची साठी ओलांडल्यानंतर प्रती महिना 5 हजार रुपये पेन्शनचा लाभ घेऊ शकतात. पेन्शनची मर्यादा 5 हजारांहून 10 हजार करण्यावर सरकारकडून विचार सुरू आहे.

18 ते 40 वर्षांच्या नागरिकाला मिळणार लाभ
यासाठी बँकेत अथवा पोस्ट ऑफिसमध्ये केवळ एक बचत खाते उघडण्याची गरज आहे, जर पहिल्यापासूनच खाते असेल तर केवळ या योजनेसाठी तुम्ही अर्ज दाखल करा आणि गुंतवणुकीला सुरुवात करू शकतात. तुम्ही प्रती महिना, तीन महिने किंवा सहा महिन्यांमध्ये पेमेंट करू शकतात. देशाचा कोणताही नागरिक ज्याचे वय 18 ते 40 वर्षांमध्ये आहे तो या योजनेमध्ये गुंतवणूक करू शकतो.

ऑनलाइन सेवा
अटल पेन्शन योजनेचा फॉर्म सर्व बँकांच्या संकेतस्थळांवर उपलब्ध आहे. हा फॉर्म डाऊनलोड करून संपूर्ण माहिती भरावी त्यानंतर हा फॉर्म बँकेत पुन्हा जमा करावा. यासोबत काही कागदपत्रेही लागतील.