महिलांना पाहून शिट्या का वाजवतात म्हटल्याचा राग आल्याने दोघांना मारहाण

जळगाव : महिलांना पाहून शिट्या का वाजतात ? असा जाब विचारल्याच्या कारणावरून तरुणासह त्याच्या भावाला चौघांनी लाथाबुक्क्यांनी मारहाण करीत दगडफेक करून दुखापत केली. ही घटना नशिराबाद बसस्थानकाजवळ घडली. याबाबत नशिराबाद पोलिस ठाण्यात चौघांवर गुन्हा दाखल करण्यात आला.

चौघांविरोधात गुन्हा दाखल
फजलखान फरीद खान (18, अली मोहल्ला, नशिराबाद) हा तरुण आपल्या कुटुंबियांसह वास्तव्याला आहे. पेंटरकाम करून आपला उदरनिर्वाह करतो. मंगळवार, 14 जून रोजी दुपारी फजलखान हा त्याचा चुलतभाऊ दानिश खान रईस खान याच्यासोबत घरी पायी जात असतांना बसस्थानकाजवळ रूपेश माळी, वासू माळी, विनोद माळी, गणेश माळी (सर्व रा.नशिराबाद, ता.जि.जळगाव) हे महिलांकडे पाहून शिट्या मारत होते. त्यावर महिलांना पाहून शिट्या का मारतात ? असा जाब फजलखान याने विचारला. याचा राग असल्याने चौघांनी शिवीगाळ करून लाथाबुक्क्यांनी बेदम मारहाण केली त्यानंतर दगडफेक केली. यात फजल खानचा चुलत भाऊ दानिश खान याचे डोके फोडले व दोघांना जीवे ठार मारण्याची धमकी दिली. जखमी झालेल्या दोघांना जिल्हा शासकीय वैद्यकीय महाविद्यालयात उपचारार्थ दाखल करण्यात आले आहे.

यांच्याविरोधात दाखल झाला गुन्हा
फजल खान याने दिलेल्या फिर्यादीवरून संशयीत आरोपी रूपेश माळी, वासू माळी, विनोद माळी, गणेश माळी (सर्व रा.नशिराबाद) यांच्या विरोधात नशिराबाद पोलीस ठाण्यात गुन्हा दाखल करण्यात आला आहे. पुढील तपास पोलिस उपनिरीक्षक राजेंद्र साळुंखे करीत आहे.