महिला जलतरणपटूचे चित्रीकरण केल्याप्रकरणी दिव्यांग जलतरणपटूचे निलंबन

नवी दिल्ली । दिव्यांग जलतरणपटू प्रशांत करमाकरवर भारताच्या पॅरालिम्पिक समितीने तीन वर्षांची बंदी घातली आहे. महिला जलतरणपटूचा स्विमिंग करतानाचा व्हिडिओ रेकॉर्ड केला म्हणून पॅरालिम्पिक समितीने प्रशांतवर कारवाई केली आहे. गेल्यावर्षी जयपूरमध्ये 31 मार्च ते 3 एप्रिल दरम्यान नॅशनल पॅरा स्विमिंग चॅम्पियनशिपची स्पर्धा झाली होती. त्यावेळी ही घटना घडली होती. प्रशांतने कॉमनवेल्थ गेम्स 2010 मध्ये भारतासाठी कांस्यपदकाची कमाई केली होती. महिला जलतरणपटूने दिलेल्या लेखी तक्रारीनंतर पॅरालिम्पिक समितीने त्याला निलंबित केले होते. स्पर्धेदरम्यान प्रशांतने त्याचा कॅमेरा एका सहकार्‍याकडे देऊन महिला स्पर्धकाचा स्विमिंग करतानाचा व्हिडिओ काढायला सांगितला होता. महिला स्पर्धकाच्या पालकांनी या व्हिडिओ चित्रीकरणावर आक्षेप घेत तक्रार केली. त्यावेळी पॅरालिम्पिक समितीचे चेअरमन डॉ. व्ही.के.दाबास यांनी व्हिडिओ काढणार्‍याला बोलवून जाब विचारला. त्यावेळी त्याने आपण प्रशांत करमाकरच्या सांगण्यावरून व्हिडिओ बनवत असल्याचे सांगितले.

यानंतर प्रशांत स्वत:च ट्रायपॉड कॅमेर्‍याच्या सहाय्याने व्हिडिओ बनवत होता. यावेळा त्याला रोखून व्हिडिओ डिलीट करण्यासाठी सांगितले असता त्याने वाद घातला. माझ्या सहकार्‍याला व्हिडिओ वनवण्यापासून का रोखले असा प्रतिप्रश्‍न त्याने केला. यानंतर संबधीत जलतरणपटू महिलेच्या पालकांनी लेखी तक्रार दिली. याच प्रकरणात त्याच्यावर तीन वर्षे बंदीची कारवाई करण्यात आली आहे.