माजी आमदारांच्या मुलाच्या कारला अपघात

जळगाव । माजी आमदार चिमनराव पाटील यांच्या मुलाच्या कारचा अपघात झाल्याची घटना पाळधी जवळील पोखरी फाट्याजवळ रविवारी सायंकाळी 5.30 वाजेच्या सुमारास घडली. अपघातात मात्र आमदार पुत्रास डोक्याला व हाताला गंभीर दुखापत झाली असून त्यास शहरातील खाजगी रूग्णालयात उपचारार्थ दाखल करण्यात आले आहे. माजी आमदार चिमनराव पाटील यांचे पुत्र अमोल पाटील हे एकटे त्यांच्या कार (एमएच.19.सीयू.6900) ने पारोळा येथून जळगाव येत होते. तर भुसावळ येथील माजी नगराध्यक्ष अनिल चौधरी यांच्या मुलगी हर्षा हिचे दोन ते तीन दिवसानंतर लग्न आहे. त्यामुळे लग्नाचे साहित्य घेवून चालक मनोहर ठाकूर हा आयशर (एमएच.19.झेड.9623) घेवून नाशिक येथे जाण्यासाठी निघाला होता. पाळधी गावाजवळून जात असतांना पोखळी पाट्याजवळील युगश्री वेअर हाऊससमोर आयशरला अमोल यांच्या कारने धडक दिली. धडक जोरदार असल्यामुळे कारच्या ड्रायव्हर साईडचे नुकसान झाले आणि एअर बॅग उघडली गेली. एअर बॅगमुळे अमोल यांना जास्त जखमी आल्या नाहीत, मात्र, त्यांच्या डोक्याला गंभीर दुखापत होवून रक्तस्त्राव सुरू झाला. तोच सहकार राज्यमंत्री गुलाबराव पाटील यांचे पुत्र प्रताप पाटील हे त्या रस्त्यावरून जात असतांनाच त्यांना अपघात झाल्याचे दिसले. तर माजी आमदार चिमणराव पाटील यांच्या मुलाची कार असल्याचे कळताच त्यांनी त्या ठिकाणी धाव घेतली. अमोल पाटील यांना रक्तबंबाळ अवस्थेत उचलून रूग्णवाहिकेत बसविले आणि जळगावातील खाजगी रूग्णालयात उपचारार्थ दाखल केले.