माजी महापौर, नगरसेवकांना आरोग्य विमा

पिंपरी चिंचवड : महापालिकेच्या विद्यमान नगरसेवकांबरोबरच माजी महापौर तसेच माजी नगरसेवक यांना आरोग्य विमा योजनेचा लाभ घेता येणार आहे. त्यासाठी वार्षिक पाच लाख रुपये रक्कमेचा आरोग्य विमा लागू होणार आहे. त्यामध्ये नगरसेवक, महापौर यांच्या कुटुंबिंयाना या योजनेचा लाभ होईल. नगरसेवकांच्या मागणीनंतर या योजनेत माजी नगरसेवकांचा समावेश करण्यात आला असून या विषयाला सर्वसाधारण सभेत मंजुरी देण्यात आली आहे. पिंपरी-चिंचवड महापालिकेच्या नगरसेवकांच्या कुटुंबियांना पाच लाख रुपये आरोग्य विमा योजना लागू आहे. त्यामध्ये माजी महापौरांचा समावेश करण्यासाठीचा विषय गुरुवारी (दि. 20) सर्वसाधारण सभेपुढे मंजुरीसाठी ठेवला होता.

माजी महापौर मंगला कदम म्हणाल्या की, आरोग्य विमा योजनेत माजी महापौरांचा समावेश करण्यात येत आहे. त्याचबरोबर या योजनेमध्ये माजी नगरसेवकांना देखील समाविष्ट करावे. ज्यांना या योजनेचा उपयोग घेणे उचीत वाटेल, ते लाभ घेतील. यापूर्वीही माजी नगरसेवकांचे कागदपत्र आणि फॉर्म भरून घेतले आहेत. त्याचे अद्याप काहीही झालेले नाही. या योजनेचा माजी नगरसेवकांना व त्यांच्या कुटुंबियांना देखील उपयोग झाला पाहिजे, अशी मागणी त्यांनी केली. त्यावर महापौर राहूल जाधव यांनी माजी महापौर कदम यांची सूचना मान्य करत उपसूचनेसह या विषयाला मंजुरी दिली. त्यामुळे या आरोग्य विमा योजनेचा लाभ आता विद्यमान नगरसेवकांबरोबरच माजी महापौर आणि माजी नगरसेवकांना देखील मिळणार आहे.