माथेरानमध्ये पर्यटकांची व्हॅली क्रॉसिंगला मागणी!

माथेरान । उंच डोंगरमाथ्यावर येणारे सर्वच पर्यटक हे जरी इथल्या शांतप्रिय वातावरणात आणि शुद्ध शीतल गारव्यात मग्न होत असले तरीसुद्धा अनेकांना करमणुकीसाठी त्याचप्रमाणे निसर्गाशी एकरूप होण्यासाठी काहीच साधन नसल्याने असंतुष्ट दिसत आहेत.यासाठी मागील काळात काही होतकरू युवकांनी पर्यटकांच्या सेवेसाठी सुरू केलेली व्ह्याली क्रोसिंग वनविभागाने बंद केल्यामुळे नाराजीचा सूर उमटताना दिसत आहे. माथेरानमध्ये एकूण अडतीस पॉइंट्सपैकी मोजकेच ठरावीक काही पॉइंटस् पाहण्याजोगे असून बहुतांश पर्यटक हे पॉइंट्स वरून नैसर्गिक दृश्ये न्याहाळीत असतातच. या डोंगर दर्‍यांच्या सोबत हितगुज साधावे यासाठी सुद्धा ते आतूरलेले असतात. याकामी मागील काळात येथील एको पॉइंट्स तसेच अन्य पॉइंट्सवर व्हॅली क्रॉसिंगची सोय इथल्या होतकरू युवकांनी केल्यामुळे त्यांना चांगल्या प्रकारे रोजगार निर्माण झाला होता. पर्यटकांची संख्यासुद्धा या एकमेव आकर्षणामुळे वाढली होती. परिणामी या रोजगाराचे उत्पन्न सर्वश्रुत झाल्यानंतर अनेकांनी याच व्यवसायाकडे आपले लक्ष केंद्रित केल्यामुळे काही पॉइंट्सवर व्हॅलीच्या रोपांमुळे विद्रुपीकरण व्हायला लागले.

कष्टदायी कामे करून कुटुंबाचा चरितार्थ भागवण्यासाठी झटत
त्यातच अंतर्गत मतभेद आणि यामध्ये राजकारण आल्याने या मतभेदांनी अखेरीस या जागा वन विभागांच्या अखत्यारीत येत असल्यामुळे हे पर्यटकांच्या करमणुकीचे आकर्षण असलेली व्हॅली क्रॉसिंग वनखात्यामार्फत बंद करण्यात आली. त्यामुळे अनेकांच्या रोजगारांवर, उदरनिर्वाहावर गदा आलेली आहे. व्हॅली क्रॉसिंग बंद केल्यामुळे पर्यटकांची संख्या आपोआपच रोडावली आहे.याचा विपरीत परिणाम एकंदरीत इथल्या पर्यटनावर झालेला दिसून येत आहे.

नुकताच झालेल्या कर्जत -डिकसळ गार्बट पॉइट मार्गे माथेरान या महत्वाकांक्षी रोप-वे प्रकल्पाबाबतच्या विशेष जनसुनावणी बैठकीच्या वेळी नगरपालिका गटनेते प्रसाद सावंत यांनी जर या रोप-वेसाठी वरिष्ठ पातळीवर परवानगी मिळत असेल तर याच धर्तीवर माथेरानच्या व्हॅली क्रॉसिंगसाठीसुद्धा संबंधित कंपनीने पुढाकार घेऊन व्हॅली क्रॉसिंग हे पर्यटकांच्या आकर्षणाचे साधन सुरू होण्यासाठी लक्ष केंद्रित करावे, असे सूचित केले होते, तर हा व्यवसाय सुरू करावयाचा झाल्यास भोपाळ येथील वनखात्याच्या मुख्य कार्यालयाकडून परवानगी आणावी, असे येथील वनखात्याचे म्हणणे आहे. त्यामुळे तूर्तास तरी स्थानिक तरुण रोजगाराच्या शोधात मिळेल. ती कष्टदायी कामे करून आपल्या कुटुंबाचा चरितार्थ भागवण्यासाठी झटत आहेत.