मानकर यांचे शहराध्यक्षपद हुकणार?
पुणे । राष्ट्रवादी काँग्रेसचे पुण्यातील विद्यमान नगरसेवक दीपक मानकर यांच्यावर कर्मचार्‍याला आत्महत्येस प्रवृत्त केल्याप्रकरणी समर्थ पोलीस ठाण्यात गुन्हा दाखल करण्यात आला आहे. गुन्हा दाखल झाल्यानंतर मानकर पसार झाले असून पोलीस त्यांचा शोध घेत आहेत. दरम्यान, या गुन्ह्यामुळे आगामी लोकसभा आणि विधानसभा निवडणुकीच्या दृष्टीने दीपक मानकर यांच्या अडचणींमध्ये वाढ होण्याची शक्यता आहे. दीपक मानकर हे पुणे शहर राष्ट्रवादीच्या शहर अध्यक्षपदासाठी इच्छुक होते. यामध्ये त्यांचे नावही सर्वात आघाडीवर होते. 10 जूननंतर राष्ट्रवादीचे नेते अजित पवार हे नव्या शहर अध्यक्षाची घोषणा करणार होते. परंतू आता या प्रकरणामुळे मानकर यांना शहराध्यक्षपद मिळण्याची शक्यता कमी झाली आहे.
काय आहे प्रकार
दीपक मानकर यांच्याकडे गेली अनेक वर्षे काम करणार्‍या जितेंद्र जगताप नावाच्या व्यक्तीने (2 जून) घोरपडी भागात रेल्वेखाली उडी घेऊन आत्महत्या केली होती. आत्महत्येपूर्वी जगताप यांनी लिहलेल्या सुसाईड नोटमध्ये दीपक मानकर, बील्डर सुधीर कर्नाटकी, विनोद भोळे यांच्या त्रासाला कंटाळून आत्महत्या करत असल्याचे लिहिले होते. रास्ता पेठेतील एका जागेच्या वादातून हा प्रकार घडला आहे.
मानकर यांनी 1 जूनलाच दिला होता अर्ज
जगताप हा अनेक वर्ष मानकरांचे जमिनीचे व्यवहार पहात होता. मात्र गेल्या काही महिन्यांपासून समर्थ पोलिस स्टेशनसमोर असलेल्या जागेवरून वाद सुरू होता. त्यासाठी मानकर, कर्नाटकी, भोळे यांच्या बैठकाही झाल्या होत्या. जागेचा ताबा सोडण्यासाठी मानकर जगतापवर दबाव टाकत होते. दरम्यान, जगताप हा खंडणी उकळण्यासाठी आत्महत्येची धमकी देत होता आणि त्याबद्दलचा अर्ज आपण 1 जूनलाच दिल्याचे म्हटले आहे.