मारहाणी प्रकरणी सहा संशयितांना वाढीव पोलीस कोठडी

जळगाव : गोविंदा रिक्षा स्टॉपजवळ दोन तरुणांना रात्रीच्यावेळी मारहाण झाली होती. या प्रकरणी शहर पोलिस ठाण्यात गुन्हा दाखल करण्यात आला. याप्रकरणी पोलीस कोठडीत असलेल्या सहाही संशयितांच्या कोठडीची मुदत संपल्यानंतर त्यांना प्रथम वर्ग न्यायदंडाधिकारी प्रतिभा पाटील यांच्या न्यायालयात हजर केले असता त्यांना दोन दिवसांची वाढीव पोलीस कोठडी सुनावली.

गोविंदा रिक्षा स्टॉप चौकात 1 जानेवारी रोजी रात्री नऊ वाजेच्या सुमारास जुनेद शेख अनीस (वय 28, एमआयडीसी परिसर), जुबेर शेख फरिद (वय 29, रा. फातेमानगर) हे आयनॉक्सस थिएटरमध्ये सिनेमा बघितल्यानंतर घरी जात होते. त्या वेळी तोंडाला रुमाल बांधलेल्या दहा ते बारा तरुणांच्या टोळक्याने लाकडी दांडक्यांनी दोघांना मारहाण केली होती. याप्रकरणी अंकुश मधुकर सुरवाडे, मयूर राजेंद्र सोनार, भूषण भरत सोनवणे, भूषण अंबादास सपके, रुपेश सुभाष काकडे अटक करून त्यांना न्यायालयात 7 जानेवारी पर्यंत पोलीस कोठडी सुनावली होती. आज शनिवारी या सहाही संशयितांच्या पोलीस कोठडीची मुदत संपल्यानंतर त्यांना प्रथम वर्ग न्यायदंडाधिकारी प्रतिभा पाटील यांच्या न्यालयात हजर करण्यात आले होते. न्या. पाटील यांनी या सहा संशयितांना वाढीव दोन दिवसांची पोलीस कोठडी सुनावली. सरकारतर्फे अ‍ॅड. अनिल गायकवाड यांनी कामकाज पाहिले.