मार्चअखेर निधी खर्च करावा : प्रांताधिकारी

बारामती । शासनाच्या विविध योजना जिल्हा परिषद, पंचायत समितीमार्फत राबविण्यात येत असतात. या योजनांची अंमलबजावणी करण्याच्या कामाला गती देण्यात यावी. योजनांतर्गत मंजूर कामांकरीता निविदा प्रक्रिया तात्काळ पूर्ण करण्यात येऊन मार्च, 2018 अखेर संपूर्ण निधी खर्च करण्याच्या सूचना प्रांताधिकारी हेमंत निकम यांनी दिल्या.पंचायत समिती, बारामती येथील सभागृहात पंचायत समितीअंतर्गत विविध विभागांची कामकाज आढावा बैठक आयोजित करण्यात आली होती. यावेळी संजय भोसले, शारदा खराडे, भरत खैरे, प्रमोद काकडे, राहुल भापकर, भारत गावडे, रोहित कोकरे, मेनका मगर, लीलाबाई गावडे, प्रमोद काळे आदी
उपस्थित होते.

निकम म्हणाले, तालुक्यात आमदार, खासदार फंडातून मंजूर झालेला निधी वेळेत खर्च झाला पाहिजे. पंचायत समितीचे विस्तार अधिकारी यांनी योजनांच्या अंमलबजावणीकरिता नियोजन करावे. तालुक्यातील ग्रामपंचायतींची घरपट्टी, पाणीपट्टी 100 टक्के वसुलीसाठी ग्रामविकास अधिकारी यांना टार्गेट देण्यात यावे. जास्त थकबाकी असेल तर त्यांना समान हप्ते बांधून देऊन वसूली करण्यात यावी. पाणीपुरवठा विभागास टंचाई आराखडा तात्काळ सादर करण्याच्या सूचना दिल्या. टंचाई आराखड्यामध्ये टँकर बंद करण्याच्या दृष्टीने विहिरी, पाइपलाइन यांचा समावेश करावा. पाणीपुरवठ्याच्या छोट्या-छोट्या योजना कार्यान्वित करण्याच्या सूचना निकम यांनी दिल्या.

पंचायत समितीअंतर्गत बांधकाम, घरकुल योजना, कृषी, शिक्षण, छोटे पाटबंधारे, जलसंधारण विभागांच्या कामांचा आढावा घेण्यात आला. या विभागामार्फत पूर्ण व प्रगतीपथावर असलेल्या कामांसंदर्भात माहिती घेण्यात आली. योजनांच्या अंमलबजावणीसाठी येणार्‍या अडचणी जाणून घेऊन त्याचे निराकरण निकम यांनी यावेळी केले.