मालवाहू रीक्षाच्या धडकेत बर्‍हाणपूरचा रूमाल विक्रेता ठार

सांगवीजवळ अपघात ; अपघातानंतर वाहन चालक पसार

यावल- भरधाव मालवाहू रीक्षाने दिलेल्या धडकेत बर्‍हाणपूरचा रूमाल विक्रेता ठार झालची घटना बुधवारी रात्री आठ वाजता यावल-फैजपूर रस्त्यावरील सांगवी गावाजवळ घडली. या अपघातात प्रमोद रमेश पवार (वय 29, रा. बर्‍हाणपूर) हा तरुण ठार झाला. अपघातानंतर रीक्षाचालक वाहन सोडून पसार झाला. दुचाकी (एम.पी.68 एम.डी.6807) वरून रूमाल विक्री करणारा मध्यप्रदेशातील बर्‍हाणपूर रहिवासी प्रमोद रमेश पवार हा यावलकडून फैजपूरकडे जात असताना फैजपूरकडून मालवाहू अ‍ॅपे रीक्षा (एम.एच.19 एस.9963) ने जोरदार धडक दिली. सांगवी गावाच्या पुढे पीर बाबांच्या दर्ग्याजवळ झालेल्या या अपघातात दुचाकीस्वार रस्त्याच्या कडेला फेकला गेल्याने त्याच्या डोक्याला जबर दुखापत झाल्याने त्याचा जागीच मृत्यू झाला.