मालेगाव स्फोटप्रकरणी साध्वी प्रज्ञासिंगला जामीन मंजूर
मुंबई । सन 2008मध्ये झालेल्या मालेगाव बॉम्बस्फोट प्रकरणातील आरोपी साध्वी प्रज्ञा सिंह ठाकूर हिला मंगळवारी मुंबई उच्च न्यायालयाकडून जामीन मंजूर करण्यात आला, तर दुसरीकडे या खटल्यातील मुख्य आरोपी कर्नल प्रसाद पुरोहित यांना जामीन देण्यास मात्र न्यायालयाने नकार दिला. दरम्यान, जामिनावर सुटका करण्यात आलेली साध्वी प्रज्ञा सिंह याप्रकरणी गेल्या नऊ वर्षांपासून तुरुंगात होती. अखेर आज न्यायालयाकडून पाच लाख रुपयांच्या वैयक्तिक जातमुचलक्यावर तिला जामीन देण्यात आला.
गेल्यावर्षी मकोका हटवल्यावर केला होता जामिनासाठी अर्ज
एप्रिल 2016 मध्ये एनआयएने साध्वीला क्लीन चिट देत आरोपींवरील ‘मकोका’ हटवला. त्यानंतर साध्वीने विशेष न्यायालयात जामिनासाठी अर्ज केला. मात्र, विशेष न्यायालयाने तिच्याविरुद्ध सबळ पुरावे आहेत, असे म्हणत तिचा जामीन अर्ज फेटाळला होता. विशेष न्यायालयाच्या या निर्णयाला साध्वीने उच्च न्यायालयात आव्हान दिले होते. आज सुनावणी झाली असता न्यायालयाने जामीन मंजूर केला. मात्र, लेफ्टनंट कर्नल प्रसाद पुरोहित यांचा जामीन अर्ज न्यायालयाकडून फेटाळण्यात आला आहे.
आरोपींनी जबाब फिरवल्याने तिच्याविरुद्ध पुरावे नाहीत
बॉम्बस्फोटात वापरलेली मोटारसायकल आपली असली, तरी ती दुसर्‍याला विकण्यात आल्याचा दावा साध्वीने उच्च न्यायालयात केला होता. साध्वी आजारी असल्याने तिचा जामीन मंजूर करण्यात यावा, अशी विनंती साध्वीच्या वकिलांनी न्यायालयाला केली होती. साध्वीच्या जामीन अर्जावर एनआयएनेही आक्षेप घेतलेला नव्हता. ‘साध्वीविरुद्ध पुरावे नसल्याने व काही आरोपींनी त्यांचा जबाब फिरवल्याने तिच्याविरुद्ध पुरावे नाहीत,’ असा युक्तिवाद एनआयने खंडपीठापुढे केला होता.
साध्वीपाठोपाठ लेफ्टनंट कर्नल प्रसाद पुरोहितनेही उच्च न्यायालयात जामिनासाठी अर्ज केला होता. यूएपीएची सुधारित तरतूद पूर्वलक्षीत प्रभावाने लागू केली जाऊ शकत नाही तसेच या तरतुदीनुसार यूएपीए लागू करण्यासाठी विशेष समितीची मंजुरी घेणे आवश्यक आहे. मात्र, जानेवारी 2009 मध्येही समितीच अस्तित्वात नव्हती. त्यामुळे सुधारित तरतुदींनुसार पुरोहितला जामीन नाकारणे बेकायदा आहे, असे पुरोहितने याचिकेत म्हटले होते. पुरोहितच्या जामीन अर्जावर एनआयएने आक्षेप घेतला होता. न्यायालयाने साध्वी प्रज्ञा यांना जामीन दिला असला, तरी कर्नल प्रसाद पुरोहित यांचा जामीन अर्ज फेटाळला आहे.