नारायणगाव ।( अशफाक पटेल ) माळशेज घाटातील निसर्ग सौंदर्याची भुरळ फक्त महाराष्ट्रालाच नाही, तर देशभरातील पर्यटकांना पडली आहे. माळशेजचे हे सौंदर्य आता जगाच्या नकाशावर आणण्याच्या हालचाली सुरू झाल्या आहेत. लवकरच माळशेज घाटात देशातला पहिला पारदर्शक पूल (वॉक वे) बांधण्यात येणार आहे. माळशेज घाटातील 700 मीटर खोल दरीवर 18 मीटर लांबीचा पारदर्शक वॉक-वे बांधण्याचा प्रस्ताव ठाणे जिल्हा प्रशासनाने मांडला असून, हा प्रस्ताव आणि बजेटला मंजुरी मिळाल्यास येत्या तीन वर्षात हे स्वप्न प्रत्यक्षात उतरेल. तसे झाल्यास हा देशातील पहिला पारदर्शक पूल ठरेल.
हवेत चालण्याची अनुभूती
कल्याण-अहमदनगर हायवेवर माळशेजमध्ये एमआरटीडीसीचे रिसॉर्ट आहे. त्याच्या जवळच माळशेजच्या दरीलगत दुमजली इमारत बांधण्यात येणार असून, त्यावर हा पारदर्शी वॉक वे असेल. 18 मीटर लांबीचा यू-शेप वॉक वे बांधण्याची प्रशासनाची योजना आहे. वॉक वेचे फ्लोरिंग पारदर्शी (काचेचे) असेल. या वॉक वेवरून चालताना पर्यटकांना हवेत चालण्याचे थ्रिल अनुभवता येईल. खोल दरीचा नयनरम्य नजारा पाहता येईल आणि फोटो काढण्याचीही मुभा असेल.
महसुलात वाढ
सार्वजनिक बांधकाम खात्याच्या राष्ट्रीय महामार्ग विभागाने दोन टप्प्यात ही योजना प्रत्यक्षात आणायची आहे. पहिल्या टप्प्यात वॉक वेचे बांधकाम, तर दुसर्या टप्प्यात आर्ट गॅलरी, अॅम्पिथिएटर, म्युझिकल फाउंटन याची रचना करायची आहे. आमदार किसन कथोरे यांनी हा प्रस्ताव मांडला असून, ठाण्याचे पालकमंत्री एकनाथ शिंदे यांनी त्याला पाठिंबा दर्शवला आहे. माळशेज घाट पावसाळ्यात पर्यटकांनी फुललेला असतोच, मात्र वॉक वे बांधल्यावर वर्षाचे 365 दिवस येथे पर्यटकांची गर्दी होईल. जिल्ह्याच्या महसुलात वाढही होईल आणि जागतिकदर्जाचे पर्यटनस्थळही विकसित होईल, असे दुहेरी उद्दिष्ट आहे.