मावळमधून राष्ट्रवादीची भाजपा नगरसेवकाला उमेदवारी !

मावळ: विधानसभा निवडणुकीसाठी उमेदवारी अर्ज दाखल करण्यासाठी शेवटचे काही तास शिल्लक राहिले आहे. आज बहुतांशी उमेदवाराने अर्ज दाखल केला आहे. दरम्यान पुणे जिल्ह्यातील मावळ मतदारसंघातून मंत्री संजय उर्फ बाळा भेगडे यांच्या विरोधात राष्ट्रवादीने भाजपचेच नगरसेवक सुनिल शेळके यांना उमेदवारी दिली आहे. त्यामुळे मावळातील राजकीय घडामोडीने वेग घेतला आहे.

सुनिल शेळके आणि संजय भेगडे यांच्यात सुरुवातीपासून वैमनस्य आहे. या सर्व घटनांमुळे मावळमधील राजकारणात भाजपाला धक्का बसला आहे. विधानसभेतच ही उलथापालत झाल्याने अनेकांच्या भुवया उंचावल्या आहेत. गेल्या काही दिवसांपासून भारतीय जनता पक्षात अनेक नेत्यांची भरती सुरू होती. मात्र, ऐन निवडणुकांमध्ये भाजपामधील बंडखोरी पुढे येताना दिसत असून नाराज नेत्यांच्या संख्येत वाढ झाली आहे.

सुनिल शेळके हे तळेगाव दाभाडे येथील नगरपरिषदेचे माजी उपनगराध्यक्ष आहेत. भाजपातील निष्ठावंत नेते म्हणून शेळके यांची ओळख होती. भाजपाकडून विधानसभा निवडणूक लढवण्यासाठी सुनील शेळके हे इच्छुक होते. मात्र, संजय उर्फ बाळा भेगडे यांना भाजपाची उमेदवारी जाहीर झाल्यानंतर त्यांनी आपली भूमिका स्पष्ट करत राष्ट्रवादीसोबत जाण्याचे संकेत दिले होते. त्याप्रमाणे आज गुरुवारी त्यांना राष्ट्रवादी काँग्रेस पक्षाकडून उमेदवारी देण्यात आली आहे. तर भेगडे हे हॅट्रिक करण्याच्या तयारीत आहेत. मावळमधील परिस्थिती पाहता विधानसभा चुरशीची होणार यात काही शंका नाही.