मासेफेकी पडली सात हजार रुपयांत

मालवण। काँग्रेसचे वरिष्ठ नेते नारायण राणे यांचे चिरंजीव आमदार नितेश राणे यांना आयुक्तांवर केलेली मासेफेकी चांगलीच महागात पडली आहे. मालवणच्या सहाय्यक मत्स्य आयुक्तांवर नितेश राणे यांनी मासेफेक केली होती. याप्रकरणी मंगळवारी पोलिसांकडून नितेश राणे यांना अटक करण्यात आली. त्यानंतर त्यांना सत्र न्यायालयात हजर करण्यात आले. तेव्हा न्यायालयाने सात हजार रूपयांच्या वैयक्तिक जातमुचलक्यावर त्यांची सुटका केली. नितीश राणे यांच्यासह अन्य 24 जणांना न्यायालयाकडून जामीन मंजूर करण्यात आला. आज सकाळपासून न्यायालयाच्या नितेश राणेंसंदर्भातील निकालाकडे सर्वांचे लक्ष लागले होते. गोवा राज्यातील पर्ससीन मच्छीमार मासेबंदी कालावधीत येऊन मच्छीमारी करत आहेत. त्यासाठी महिनाकाठी 25 ते 30 लाखांचा हप्ता दिला जात आहे. या भ्रष्टाचाराविरोधात पारंपरिक मच्छीमार नितेश राणे यांच्या नेतृत्त्वाखाली एकवटल्याचे नारायण राणे यांनी यावेळी सांगितले होते.

परप्रांतीय मच्छीमारांविरोधात आक्रमक
नितेश राणे परप्रांतीय मच्छिमारांच्या मुद्द्यावरून काही दिवसांपूर्वी भलतेच आक्रमक झाले होते. यावेळी त्यांनी सहाय्यक मत्स्य आयुक्तांच्या कार्यालयात जाऊन त्यांना परप्रांतीय मच्छीमार बंदीच्या काळातही मासेमारी कसे करतात, याचा जाब विचारला होता. यावेळी त्यांनी आयुक्तांसमोरील टेबलावर मासे फेकले. चर्चेदरम्यान अधिकार्‍यांच्या प्रतिप्रश्‍नाने संयम सुटलेल्या नितेश राणेंनी आयुक्तांना थेट मासा फेकून मारला होता. त्यानंतर सहाय्यक मत्स्य आयुक्त वन्स यांनी राणे यांच्याविरोधात पोलीस ठाण्यात तक्रार दाखल केली होती. सहाय्यक मत्स्य आयुक्त वन्स यांनी उद्धट उत्तरे दिली, असं नितेश राणेंच्या समर्थकांकडून सांगितले जात आहे.

नारायण राणेंनी केले होते समर्थन
नारायण राणे यांनी आपल्या मुलाच्या मासे फेकण्याच्या कृतीचे समर्थन केले होते. माझ्या मुलाने घेतलेला निर्णय चुकीचा नव्हता. पारंपरिक मच्छीमारांच्या आंदोलनाला त्याने पाठिंबा दिला असल्याचे त्यांनी म्हटले होते. पारंपरिक मच्छीमारांना न्याय मिळवून देणासाठी आंदोलन होते. आंदोलनात एकापेक्षा अनेक जण एकत्र आल्यावर आंदोलनाचे स्वरूप बदलते. त्यामुळे त्याने बांगडा मारल्याचे नव्हे तर अन्यायाविरोधात आंदोलनाचे नेतृत्व केले, असे ते म्हणाले.